ته‌مموز 19, 2019

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

چالاكڤانەك:بنگەهێ‌ لالش پەیاما ئێزدیان گەهاندیە وەلات و نەتەوێن جیاواز

چالاكڤانەك:بنگەهێ‌ لالش پەیاما ئێزدیان گەهاندیە وەلات و نەتەوێن جیاواز
تۆرا لالش یا راگەهاندنێ‌/سالار فائز
ب هەلكەفتا بۆرینا(26)سالان بسەر دامەزراندنا بنگەهێ‌ لالش یێ‌ رەوشەنبیری و كولایەتی ل دهۆكێ‌،گەنج و رۆژنامەڤان و چالاكڤان ئاماژێ‌ ب وێ‌ چەندێ‌ ددەن كو بنگەهێ‌ لالش دڤان سالێن دەربازبووی دا رۆلەكی بەرچاڤ هەبوویە د خزمەتكرنا جڤاكا ئێزدی دا،كو بوویە دەرگەهەك بۆ گەهاندنا پەیاما ئێزدیان بۆ وەلات و نەتەوێن جێواز و چرایەكی گەش و زنجیرەكا بهێز ل ناڤبەرا ئێزدیا و پێكهاتێن دی یێن جڤاكی دا.
(جەمال دەروێش)گەنجەكی ئێزدی یە ل وەلاتێ‌ ئەلمانیا ئاكنجی یە دبێژت:بێگۆمان بنگەهێ‌ لالش دڤان سالێن دەربازبووی دا رۆلەكی بەرچاڤ هەبوویە د خزمەتكرنا جڤاكا ئێزدی دا ژ هەموو تەخان ڤە، بگرە ژ تەخا گەنجان و هاندانا وان ژبۆ كارێن جودا جودا چ یێن راگەهاندنێ‌ و چ یێن فێركرنا خۆلان،هەروەسا دەستەیا بنگەهێ‌ لالش هەتا رادەیەكی زۆر باش و بتر ژ وێ‌ هێزا خۆ ل قوتابیێن ئێزدیان خۆ كریە خودان ژبۆ دامەزراندن و زڤراندن و ڤەگوهاستنا وان قوتابیان ژبۆ تەمامكرنا زانكۆ و كولیژیێن وان ب تایبەتی پشتی ڤێ‌ جینۆسایدا بسەرێ‌ ئێزدیان دا هاتی ل شنگالێ‌ و ژ دەستدانا خووندن و قوتابخانە و ئاوارەبوونا وان بۆ دەڤەرێن هەرێما كوردستانێ‌،بنگەهی دەست ب تەمامكرنا خووندنا قوتابیێن شنگالێ‌ ل ناڤا قوتابخانە و پەیمانگەه و كولیژێن هەرێمێ‌ كر،ئاماژەكر بنگەهێ‌ لالش ل دەرڤەی وەلاتی ژی مینا وەلاتێ‌ ئەلمانیا كو تایەكی خۆ هەیە خزمەتەكا مەزن پێشكێشی ئێزدیان دكت،هیڤی و پێشنیارا مە بۆ بنگەهی لالش ئەوە خەلكێ‌ مە یێ‌ ئاوارەیێ‌ شنگالێ‌ ژ ڤێ‌ ژیانا ب زەحمەت و سەخت یا ئاوارەبوونێ‌ قورتال ببت و ڤەگەرنە سەر جی و وارێن خۆ ڤە.
كچا چالاكڤان(پەیمان خێری)لدۆر سالڤەگەرا بنگەهێ‌ لالش ئەڤ بۆچۆنە هەبوو،سالرۆژ دامەزراندنا بنگەهێ‌ لالش ل تەڤایا دەرچۆیێن ڤێ‌ فێرگەهێ‌ پیرۆزبت ژ رەوشەنبیر و نڤیسەر و رۆژنامەڤان و چالاكڤان و هۆنەرمەند و بەهرەمەند و مامۆستایان،چنكو بنگەه نە بتنێ‌ بنگەهەكی ئایینی یە بەلكو دەرگەهەكە ژبۆ هەر بزاڤەكێ‌ كو كەسێ‌ ئێزدی بكارت رۆلێ‌ خۆ دناڤا جڤاكێن جودا جودا ل هەرێما كوردستانێ‌ تایبەت دهۆكێ‌ ببینت،ل ڤان سالێن داویێ‌ ژمارەكا زۆر یا كەسان ژ ئایین و ژ نەتەوێن جودا جودا قەستا بنگەهێ‌ لالش كرینە ژبۆ نڤیسینا دیرۆكا ئێزدیان و بنگەه بوویە دەرگەهەكی باش ژبۆ گەهاندنا پەیاما ئێزدیان بۆ وەلات و نەتەوێن جێواز،پەرتۆكێن بنگەهێ‌ لالش ژ زارۆكینێ‌ هەتا بووینە دەرچۆین زانكۆیا ژی مە كاری مفایەكی باش ژێ‌ بینن و ژ دەرئێخستنا ئێكەم پەرتۆكێ‌ دا هەتا نهۆ ژی رۆلەكی رەوشەنبیری و ئایینی یێ‌ باش بۆ خەلكێ‌ خۆ هەبوویە نەبتنێ‌ ئێزدیا بەلكو هەموو پێكهات و نەتەوا و ئایینان،هەر بڤێ‌ هەلكەفتێ‌ داخوازیا من ل بنگەهێ‌ لالش ئەلمانیا ئەوە بتر گرنگیێ‌ ب لایەنێ‌ كۆمەلایەتی بدەت.
ژبال خۆڤە رۆژنامەڤانا كچ(شەهلا رێكانی) دیاركر،بنگەهێ‌ لالش هەر ژ دامەزراندنێ‌ و هەتا نهۆ رۆلەكێ‌ كاریگەر هەبوویە ب تایبەت د بوارێ‌ رەوشەنبیری دا،هەروەسا ل دەمێ‌ جینۆسایدا شنگالێ‌ ژی كو ژ جینۆسایدێن هەرە مەزن بوو بنگەهێ‌ لالش رۆلەكێ‌ مەزن هەبوو،هەر ژ دەستپێكێ‌ پێنگاڤێن گەلەك مەزن و بەرچاڤ هاڤێتن ژبۆ هاریكاریكرنا ئاواران و دكیۆمێنتكرنا ئەوان رۆژێن رەش یێن بسەرێ‌ خەلكێ‌ شنگالێ‌ دا هاتین ئەڤە ژی ئێك ژ پێنگاڤێن گرنگ بوو،چنكو ئەڤ جینۆسایدا چێبووی دژی مرۆڤایەتیێ‌ بوو لەوما دكیۆمێنتكرنا ئەڤان چیرۆكێن دلتەزین و تراژیدی دێ‌ بنە ئەگەر كو خزمەتا جینۆسایدێ‌ بكن ب تایبەت ژلایێ‌ دادگەها نێڤ دەولەتی ڤە،ژئالیەكی دی ڤە رۆژناما دەنگێ‌ لالش ئێكەم رۆژنامەیە ژلایێ‌ بنگەهێ‌ لالش ڤە دئێتە دەرێخستن و ئێزدی خۆ دناڤ ڤێ‌ رۆژنامێ‌ دا دبینن و دكارن پەیاما خۆ بگەهینن،لێ‌ پێشنیار دكەم ئەڤ رۆژنامە ببتە رۆژنامەكا رۆژانە دا بتر خزمەتا جڤاكێ‌ ئێزدی بكت و پەیاما وان زووتر بگەهینت، ژبەركو نهۆ سەردەمێ‌ لەزاتیێ‌ یە داكو زوو دەنگوباس بگەهن و ئێش و ئازارێن ئێزدیا ژی زۆرن.
(عەلی عیسو)چالاكڤانەكی ئێزدی یە بەحسێ‌ رۆلێ‌ بنگەهێ‌ لالش دكت و دبێژت:دامەزراندنا بنگەهێ‌ لالش و ڤی دەستكەفتی ل هەموو ئێزدیان پیرۆزدكەم كو دبینم ئێك ژ كارێن گرنگ یێن بنگەهی دەرێخستنا رۆژناما دەنگێ‌ لالشە راستە ناڤێ‌ وێ‌ دەنگێ‌ لالشە،لێ‌ بخۆ چرایەكە بۆ ئێزدیا هەردەم یێ‌ گەش كو ژیانا تاكێ‌ ئێزدی نیشا هەر كەسی ددەت ژ كەلتۆر و كەلەپۆر و داب و نەریتا هەتا دیسان ئێش ودەردێن ئێزدیا ب زمانێ‌ وان یێ‌ دەیكێ‌،دیسان نە بتنێ‌ ژبۆ تاكێ‌ ئێزدی بەلێ‌ بۆ جڤاكێ‌ كوردی ب گشتی هەر كەس دكارت پشكداری ڤێ‌ رۆژنامێ‌ بت یان دەنگوباسێن ئێزدیا بزانت،ئەڤ بنگەهە بوو زنجیرەكا بهێز ل ناڤبەرا ئێزدیا و پێكهاتێن دی یێن جڤاكی،لەورا دخوازم بەردەوام بە و كار و پرۆژێن بەرفرەهتر هەبن،پێشنیارا من ئەوە دەنگێ‌ لالش چەند بەرپەر ب زمانێ‌ ئینگلیزی ژی هەبن دا جڤاكا نێڤ دەولەتی ژی بكارت بخوونت.

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2018 by Lalish Media Network .   Developed by Ayman Qaidi.