ئاب 20, 2019

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

كەسایەتی و رەوشەنبیرێن كوردستانێ‌ رۆلێ‌ بنگەهێ‌ لالش بلند دنرخینن

كەسایەتی و رەوشەنبیرێن كوردستانێ‌ رۆلێ‌ بنگەهێ‌ لالش بلند دنرخینن
تۆرا لالش یا راگەهاندنێ‌
بنگەهێ‌ لالش یێ‌ رەوشەنبیری و كۆمەلایەتی ل(12/5/1993)ێ‌ پشتی سەرهلدانا(1992)ێ‌ بایێ‌ ئازادیێ‌ ل هەرێما كوردستانێ‌ دا هاتە هەبوونێ‌، د رۆژانێن زۆر سەخت و دژوار دا خۆ ل كێشە و گرفتێن ئێزدیان كریە خودان و كاری ببتە پرەك دناڤبەرا ئێزدیان و پێكهاتێن دی دا و كلتۆرێ‌ ئێزدیان ب شێوەیەكی شارستانی پاراست،كەسایەتی و رەوشەنبیرێن كوردستانێ‌ رۆلێ‌ وی بۆ خزمەتكرنا جڤاكێ‌ ئێزدی و كوردستانێ‌ بلند دنرخینن.
پرۆفیسۆر(بدرخان سندی)بۆ رۆژناما دەنگێ‌ لالش دیاركر،ب هەلكەفتا بۆرینا(26)سالا بسەر دامەزراندنا دەزگەهێ‌ لالش پیرۆزباهیێ‌ ل دامەزرینەر و وكارمەند و دۆست و هەڤالێن ڤی دەزگەهی دكەم،گەلەك بلند رۆلێ‌ وێ‌ دنرخینم ل رێیا خزمەتا برایێن ئێزدی و زمان و كەلەپۆرێ‌ كوردی.
دكتۆر(عسمەت مەحەمەد خالد)وەزیرێ‌ بەرێ‌ یێ‌ پەروەردێ‌ و سەرۆكێ‌ بەرێ‌ یێ‌ زانكۆیا دهۆكێ‌ بۆ رۆژناما دەنگێ‌ لالش دبێژت:بنگەهێ‌ لالش د رۆژانێن زۆر سەخت و دژوار دا كاری خۆ ل كێشە و گرفتێن ئێزدیان بكەتە خودان و دەمێ‌ ل زانكۆیا دهۆك پەیوەندیێن زۆر بهێز دناڤبەرا مەدا هەبوون و مەكاری خزمەتەكا مەزن پێشكێشی قوتابیێن ئێزدی ب تایبەت یێن شنگالێ‌ بكن د بیاڤێ‌ ڤەگوهاستنا وان دا،لەوا ب دل و جان ڤێ‌ رۆژا مێژوویی پیرۆز دكەم.
رەوشەنبیر(فەهمی سەلمان) بۆ رۆژناما دەنگێ‌ لالش گۆت:بنگەهێ‌ لالش كاری ببتە پرەك دناڤبەرا ئێزدیان و پێكهاتێن دی دا و كلتۆرێ‌ ئێزدیان ب شێوەیەكی شارستانی پاراست،راستە لالش تایبەتمەندیا ئێزدیان پاراست لێ‌ خەلكێ‌ كوردستانێ‌ ب گشتی و خەلكێ‌ دهۆكێ‌ ب تایبەتی مفایەكی مەزن ژ هەبوونا ڤی بنگەهی وەرگرت.
كەسایەتی و بەرپرسێ‌ لقێ‌ هەڤدە یێ‌ پارتی دیموكراتی كوردستان(قادر قاچاغ) بۆ رۆژناما دەنگێ‌ لالش دیاركر،ب هەلكەفتنا(٢٦) سالیا دامەزراندنا بنگەهێ‌ لالش یێ‌ رەوشەنبیری كو شانازیێ‌ دكەم ئێك ژدامەزرێنەرانم پرژدل پیرۆزباهیێ‌ ل سەرۆك و دەستەكا رێڤەبەرا ڤی بنگەهی دكم و درێیا وانرا سلاڤ و رێز بۆ تەڤایا هەڤالێن كارمەندێن ڤی بنگەهی ب دەمەكی كێم خزمەتەكا مەزنا كلتۆر و چاندێ‌ كوردێن ئێزدیێن رەسەن كری ،ب راستی پێنگاڤێن ڤی بنگەهی هاڤێتین ژلایێ‌ كلتۆری و جڤاكی ڤە چ كۆمكرن و ئەرشیفكرنا دەقێت كلتۆری و ئۆلی و چ دەركرنا گۆڤار و رۆژنامە و بەلاڤۆكا و پەرتۆكا و پشتەڤانیا نڤیسەر و رێبەرێت ئۆلی و تەخا هەژار و بەلنگازا و خۆكرنە خودان ل كۆچبەر و یێن ژ دەستێ‌ داعش رزگاربووین و گێرانا سمینارا هەردەم جیێ‌ شانازی و رێز گرتنێ‌ نە،هیڤیدارین رۆژ ب رۆژ خزمەت و خەباتا وان ب تەڤ پێشڤەبچت بۆ گەهشتنا داخازو مەرەمێن مەزنتر.
سەرۆكێ‌ ئێكەتیا نڤیسەران تایێ‌ دهۆكێ‌(حەسەن سلێڤانەیی) بۆ رۆژناما دەنگێ‌ لالش خویاكر،پیرۆز بت(26)سالیا بنگەهێ‌ لالش ناڤەندەكا رەوشەنبیری و كۆمەلایەتی یا دیار ل دهۆكێ‌،حكومەتا هەرێما كوردستانێ‌ ب دەلالی و نازداری چاڤدێری و پشتەڤانیا وی كری یێ‌ ب رەنگەك بەرفرەه نە مینا چوو ناڤەند و سەندیكا و ئێكەتیێن دیتر،لالش ناسناما خۆ یا كوردی و ئۆلی پاراستیە و خۆ ل دینێ‌ خۆ یێ‌ ئێزدی كریە خودان،بزاڤێن لالش یێن رەوشەنبیری جیێ‌ رێزگرتنێ‌ نە،هیڤی یە خۆ دناڤ سیاسەتێ‌ دا هندا نەكت و رەنگێ‌ خۆ ژ دەست نەدەت.
هەروەسا (پیر خدر سلێمان) ئێك ژ دامەزرێنەرێن بنگەهێ‌ لالش بۆ رۆژناما دەنگێ‌ لالش دا خویاكرن،بنگەهێ‌ لالش یێ‌ رەوشەنبیری و كۆمەلایەتی ل(12/5/1993)ێ‌ لسەر دەستێ‌ كۆمەكا رەوشەنبیر و ئێزدیناسان و مامۆستایان هاتە دامەزراندن هەر چەندە ژ كەڤندا هزرا رەوشەنبیری دناڤ ئێزدیان دا هەبوو، بەلێ‌ پشتی سەرهلدانا(1992)ێ‌ بایێ‌ ئازادیێ‌ د هەرێما كوردستانێ‌ دا هاتە هەبوونێ‌،بنگەهێ‌ لالش باندۆرەكا مەزن لسەر رەوشەنبیریكرن و ئەرشیفكرنا تاكێ‌ ئێزدی هەبوویە و كاریە ئەرشیفەكی مەزن كۆمڤە بكت و ئەڤە ژی دەستكەفتەكا دیرۆكی بوو د بزاڤا رەوشەنبیری یا ئێزدیان و كوردستانێ‌ دا ل هەموو جیهانێ‌ و بوویە دامەزراوەیەكا مەزن ل دەڤەرێ‌،گەرەكە بنگەهێ‌ لالش هێزا گەنجان و بتر كاراكرنا دەستێ‌ نڤیسینێ‌ و سنوورێ‌ خووندنێ‌ بەرفرەه كت و ئەڤە ژی ئێك ژ ئارمانجا بنگەهێ‌ لالشە بۆ دەستنڤیس و هزرا رەوشەنبیری،یا فەر و پێتڤیە بتر خزمەتا بنگەهێ‌ لالش بكت داكو بكارت بزاڤا رەوشەنبیری بگەهینتە هەموو دەڤەرێن ئێزدینشین و بتر كۆكا كوردایەتیێ‌ كو ئێزدیاتی یە خویا بكت و و ببتە خودیكەك هەموو تاكێ‌ ئێزدی نڤیسین و مێژوو وهزرا خۆ یا نڤیسینێ‌ دڤی دامەزراوەیێ‌ دا ببینت.

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2018 by Lalish Media Network .   Developed by Ayman Qaidi.