ئه‌یلول 23, 2019

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

كچەكا رزگاربووی:داعشێ‌ وەك كەلوپەلان كرین و فرۆتن ب كچێن ئێزدی دكر

كچەكا رزگاربووی:داعشێ‌ وەك كەلوپەلان كرین و فرۆتن ب كچێن ئێزدی دكر
باسنیوز:
كچەكا رزگاربوویا ئێزدی ژ دەستێن تیرۆرستێن داعشێ‌ راگەهاند،ژبلی رەفتارێن نەمرۆڤانە و درندانە لگەل كچان داعشێ‌ وەك كەلوپەلان كرین و فرۆتن بمە دكر،لژێر دەستێ‌ تیرۆرستان دا تووشی دەهان جۆرێن نەخۆشیێن پێستی و دەستدرێژی و ئازار و ئەشكەنجەدانا جەستەیی و دەروونی بووینە.

(ن. ب. س)ئێك ژ كچێن رزگاربوویێن ئێزدی ژێر دەستێ‌ تیرۆرستێن داعشێ‌ بۆ باسنیوز دیاركر،ژبلی رەفتارێن نەمرۆڤانە و درندانە لگەل مە دا كو وەك كەلوپەلان كرین و فرۆتن بمە دكرن،وەكی دیتر لژێر دەستێ‌ تیرۆرستێن داعشێ‌ دا تووشی دەهان جۆرێن نەخۆشیێن پێستی بووین،زێدەتری(25) رۆژان ژبەر وان نەخۆشیان دنەخۆشخانێ‌ دا مام،چنكو تیرۆرستان ب زۆری ئاڤا پیس بمە دا ڤەخوارن،ئاشكەراكر ژی دەهان جاران ژلایێ‌ تیرۆرستان هاتینە كرین و فرۆتن.
كچا رزگاربوویا ئێزدی ئاماژە ب وێ‌ چەندێ‌ كر،دەمێ‌ داعش دەست بسەر شنگالێ‌ دا گرتی ل دووریانا حەردان كەفتینە دەستێ‌ تیرۆرستان دا و ل وێدەرێ‌ برینە تللەعفەر و ل قوتابخانا (ئەزاهیر) ماین،پشتی چەند رۆژان برینە زیندانا بادۆش،ل وێدەرێ‌ ژی والیێ‌ تیرۆرستان ل گەییارە ب ناڤێ‌ ئەبوو تالیب و ئەمیرەكی دی یێ‌ داعش بناڤێ‌ ئەبوو لەیس،لگەل چەند چەتە و چەكدارێن داعش هاتن ئەم بۆ گرۆپ گرۆپ بەلاڤكرین و هەر پازدە كچ برنە بارەگایەكی داعش ل مووسل،پشتی برینە ئێك ژ بارەگەهان تیرۆرستان ئێخستینە دژۆرەكێ‌ دا وی دەمی داعشان هەر ئێكی كچەك بۆ خۆ هەلبژارد، هەر كیژ وان ب دلی بوو بۆ خۆ دبرن و ئەوا ب دلێ‌ وان نەبوو د هێلان.
گۆتژی تیرۆرستەكی بناڤێ‌ عەلی بۆ خۆ برم، پاشی ئەبوو تالیب ژ وی ستاندم و برمە گەییارە،ئێدی وان تیرۆرستان هەر تشتەك ڤیابان دكرن و كەسی ژ مە نەدكاری پاخڤین،ئەگەر نەرازیبوونا خۆ نیشان دابە ئازار دداین،جارەكێ‌ هەول دا ب رەڤم بۆ ماوێ‌ سێ‌ رۆژان هەشت جاران ب شێوەیەكی درندانە ب كارەبێ‌ ئەشكەنجەدام و هێز نەما لسەر ئەردی خۆ بگرم.
ئەو كچا رزگاربوویا ئێزدی كو هێش ترس و درندەیا تیرۆرستان ب سیمایێ‌ وێ‌ ڤە دیارە،بەحسێ‌ وان رۆژێن خۆ دكت كو دیلا دەستێ‌ ئەبوو تالیب بوو دبێژت:ئەبوو تالیب ئێخستمە ژۆرەكا كچك دا كو تەنها دەرگەهەك هەبوو،خوارن بۆ من دئینا وێدەرێ‌ و جیێ‌ دەست شۆیێ‌ ژی بوو،ب رۆژان لناڤ وان چار دیواران دا دهێلام و دەمێ‌ ڤەدگەریا ب تووندترین شێوە ئازار ددام،جەخت ل وێ‌ چەندێ‌ كر كو ل ماوێ‌ هاتیە گرتن و هەتا رزگاركرنێ‌،ژبلی دەستدرێژی و ئازار و ئەشكەنجەدانا جەستەیی و دەروونی،ب دەهان جاران هاتیە كرین و فرۆتن.
دەربارەی كریارێن تیرۆرستان وێ‌ كچێ‌ گۆت:تیرۆرستان ناچاركرین ئاڤا پیس ڤەخۆن و گەدا من تووشی هەوكرنێ‌ بوو بەرگریا ئازار و ژانێن گەدەی نەگرت،هەتا وی دەمی هەست كر زگێ‌ من ژبەر نەخۆشیەكێ‌ مەزن بوویە و وەسا هەست كر كو دووگیان بوویمە و دبێژت:هەست ب ئازارەكا زۆر ل ناڤ هناڤان دا كر و زگێ‌ من مەزن دبوو،بەلێ‌ داوی جار دەركەفت كو ئەو كیسەكە و ژبەر ئەو پیساتیا ناڤ هناڤان دا دروست بوویە و زێدەتری چار هەیڤان بدەست وێ‌ نەخۆشیێ‌ دنالیم.
(ن. ب. س) راگەهاند،دبا تووشی نەخۆشیا گەری_ گرووبوون ببام،ئێدی ڤێ‌ جارێ‌ هەموو لاشێ‌ من ل ناڤ و ژ دەرڤە ئازاردایی بوو،لەوا برمە نەخۆشخانێ‌ و پشتی نەشتەرگەریێ‌ كیسەكی مەزن ژ زگێ‌ من دەرێخست و نێزیكی هەیڤەكێ‌ لژێر چاڤدێری و چارەسەریێ‌ دا هێلام،پاشی دووبارە برمە دۆزەخا كرین و فرۆتنێ‌،هیڤی دكرن ل نەشتەرگەریێ‌ دا مربام،نەك دیسان بكەڤمە ناڤ شەری و درەندیا تیرۆرستان دا.
پشتی وان ژان و ئازار و دەردەسەری و نەخۆشیێن دیتین كچا رزگاربوویا ئێزدی دبێژت:زۆر دلخۆشم كو ب هاریكاریا نڤیسینگەها رزگاركرنا گرتیێن ئێزدی سەر ب نڤیسینگەها سەرۆكێ‌ حكوومەتا هەرێما كوردستانێ‌،ژ دەستێن تیرۆرستێن داعشێ‌ رزگارم بوو،راستە وان رۆژان ژبیر ناكەین و ژیان لگەل وان ئازاران دا ئاسان نینە،بەلێ‌ دیسان دڤێت خۆ بهێز بێخم داكو ژیانەكا ئاسایی بژیم.

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2018 by Lalish Media Network .   Developed by Ayman Qaidi.