تشرینی دووه‌م 18, 2019

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

بەرپرسێن ئیداریێن شنگالێ‌ داخوازا خزمەتكاریان بۆ قەزایێ‌ دكن

بەرپرسێن ئیداریێن شنگالێ‌ داخوازا خزمەتكاریان بۆ قەزایێ‌ دكن13236140_587365704757516_1851202259_n

ریپۆرتاج:عەزیز شەركانی
پتری پێنج هەزار خێزانان هەتا نۆكە ڤەگەریاینە ناوچەیا سنوونێ‌،ژئالیێ‌ خزمەتكاریان ڤە كارەبا نشتیمانی بۆ ماوێ‌ هەشت دەمژمێران و ئاڤ ژی ب تانكان ب وەلاتیان دئێتە دان،بەرپرسێن ئیداریێن شنگالێ‌ ژی ئاشكەرا دكن كو شنگال یا ئارامە و باژێرەكی وێرانكریە و چ خزمەتكاری ژێرە نەهاتینەكرن،داخوازێ‌ ژ حكوومەتا كوردستانێ‌ وعێراقێ‌ دكن پرۆژێن خزمەتكاری پێشكێشی شنگالێ‌ بكن و جڤاكێ‌ نێڤدەولەتی ورێكخراو ب رۆلێ‌ خۆ بلەیزن.

رێڤەبەرێ‌ ناوچەیا سنوونێ‌(نایف سەیدۆ)گۆت:پتر ژ 5 هەزار خێزانان ڤەگەریاینە ناوچێ‌ و ئەم ل گۆر شیانان ب ئەركێ‌ خۆ رادبین ،ئەو پێتڤیێن سەرەكیێن ژیانێ‌ ل هەموو ناوچێ‌ نەهاتینە بەردەستكرن و مە پێتڤی ب هاریكاریا هەردوو حكومەتێن كوردستان و عێراقێ‌ هەیە،چ هاریكاری بۆ خەلكی هەتا نهۆ نەهاتیەكرن و چ پرۆژێن خزمەتكاری ژی نەهاتینە چێكرن،كو جهێ‌ پەسنێ‌ بن،دیسان هەتا نۆكە ئەم ب وان هاریكاریێن دەست پێكا رزگاركرنا سنوونێ‌ نە كو 150 ملیۆن دینار بۆ مە هاتبوونە تەرخانكرن ژلایێ‌ جێگرێ‌ ئێكێ‌ یێ‌ پارێزگەرێ‌ مووسلێ‌ ڤە،ئەڤ گوژمە تێرا بەردەستكرنا بچووكترین پرۆژەی ناكت،هەروەسا كارەبا نشتیمانی بۆ ماوێ‌ هەتا 8دەمژمێران هەیە و هەتا كۆمەلگەها بۆرك چۆیە و ب تانكەران ئاڤێ‌ بۆ وەلاتیان دگێرین،ئاهێن خوارنێ‌ یێن خێزانێن ڤەدگەرن ژی تێنە ڤەگۆهاستن بۆ سنوونێ‌،هیڤی دكەین ل وەختەكێ‌ نێزیك ئەگەر خەلك ڤەگەریا سەر ملك ومالێن خۆ هەموو پێتڤیێن وان بێنە دابینكرن.

هەروەسا قایممقامێ‌ شنگالێ‌(مەحما خەلیل)دیاركر،شنگال هێش باژێرەكی وێرانكریە و چ خزمەتكاری ژێرە نەهاتینەكرن و رۆلێ‌ حكوومەتا عێراقێ‌ ژی دڤی دەربارەی دا شەرمەزار دكەین،ژبەركو چ هاریكاریا مە نەكریە هیڤی دكەین ل وەختەكێ‌ نێزیك بكاربن پێتڤیێن سەرەكی بۆ ژیانێ‌ بەردەست بكن،داكو خەلك ڤەگەرتە سەر ملك ومالێن خۆ،گۆتژی ئەم دزانن حكوومەتا كوردستانێ‌ د قەیرانەكە ئابووری دە دەرباس دبت،لێ‌ سەرەرای ڤێ چەندێ‌ گەرەكە پتر ب ئەركێ‌ خۆ رابن،بەلێ‌ مە چ ئۆمێد و باوەری ب حكوومەتا عێراقێ‌ نەمایە كو هاریكاریا مە بكت،دووپاتكرژی گەرەكە كۆنفرانسەكی بلەز بێتە ل دارخستن دەربارەی ئاڤەدانكرنا شنگالێ‌ كو ل سەر ئاستێ‌ كۆمەلگەها نێڤدەولەتی دەستێ‌ هاریكاریێ‌ بۆ شنگالێ‌ بێتە درێژكرن و ئێكەم پێنگاڤ دانانا سندۆقەكێ‌ بت بۆ كۆمكرنا هاریكاریان داكو شنگالێ‌ پێ‌ ئاڤابكن.

ژلایەكێ‌ دیڤە فەرماندەیێ‌ هێزا شنگال یا پێشمەرگەهێن كوردستانێ‌(قاسم شەشۆ)دبێژت:ژ روویێ‌ ئێمناهیێ‌ ڤە ناوچە یا ئارامە و پێشمەرگە د ورەیەكە بلند دایە و شنگال یا پاراستیە،هیڤیدارین خەلكێ‌ مە ڤەگەرتە سەر ملك ومالێن خۆ داكو دەست ب ئاڤاكرنا دەڤەرێ‌ بێتەكرن وژیان ڤەگەرت،ژبەركو ئەڤە ئاخا باب وباپیرێن وانە و دڤێت ژیانێ‌ لێ‌ ڤەگێرن و نەهێلن داگیركەر ب كەیف ببن،ئاماژە دا وێ‌ چەندێ‌ هەڤپەیمانیا نێڤ دەولەتی رێكخراوا داعش یا تیرۆرستی بێ‌ ورە كرینە و بەردەوام دربێن كوشتنێ‌ ل وان ددەن و ل گۆری ئەو زانیاریێن دگەهن دەستێن مە داعش گەهشتیە وێ‌ باوەریێ‌ كو وان شكەستن خواریە ل سەر دەستێ‌ پێشمەرگەی و وان چ مەفەر نینە،دووپاتكرژی داخوازێ‌ ژ هەردوو حكومەتێن كوردستان وعێراقێ‌ دكەین رابن ب پێشكێشكرنا پرۆژێن خزمەتكاری بۆ شنگالێ‌ و گەرەكە جڤاكێ‌ نێڤدەولەتی ورێكخراو رۆلێ‌ خۆ بلەیزن.

ژبال خۆڤە نونەرێ‌ شنگالێ‌ دجڤاتا پارێزگەها مووسلێ‌ دا(سەیدۆ چەتۆ) ئاشكەراكر،بەردەوام دەرد وداخوازیێن خۆ د گەهینینە جهێن بلند و داكۆكیێ‌ ل سەر مافێن وان دكن،ئەم یێ‌ كار ل سەر پرۆژەكی دكەین كو كارەبا ل شنگالێ‌ ل هەموو دەڤەرێن قەزایێ‌ بەلاڤ ب بت،لێ‌ ڤی پرۆژەی پێتڤی ب گوژمێ‌ پتر ژ هەشت ملیۆن دۆلارایە،دیسان هێش بەغدایێ‌ بودجە بۆ مووسلێ‌ نەشاندیە ژبلی گوژمەكی گەلەك كێم ژبەر ڤێ‌ یەكێ‌ پارێزگەها مووسلێ‌ د قەیرانێ‌ دایە ونكارە چ كارەكی بكت و مەژی داخواز ژ بەغدا كریە بودجێ‌ بشینن،لێ‌ هەتا ئیرۆ چ بەرسڤ نەداینە ونەشاندنە،تەكەزكر ژی ئەڤا ب سەر شنگالێ‌ دا هاتی مووسل ددەرهەقا وێ‌ نائێت،لەورا پێتڤیە بودجەكە تایبەت بۆ را بێتە تەرخانكرن ژلایێ‌ حكوومەتا عێراقێ‌ ڤە و حكوومەتا كوردستانێ‌ ژی ب ئەركێ‌ خۆ رابت پشتی دەرباسبوونێ‌ ژ قەیرانا ئابووری.

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2018 by Lalish Media Network .   Developed by Ayman Qaidi.