ئاب 21, 2019

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

بنگەهێ‌ لالش:26سالێن خەباتێ‌ و رێیەكا دۆمدرێژ ل پێشیا مەیە

بنگەهێ‌ لالش:26سالێن خەباتێ‌ و رێیەكا دۆمدرێژ ل پێشیا مەیە

_گرتیێن ئێزدی و دانپێدانا نێڤ دەولەتی ب جێنۆساید و سزادانا تیرۆرستان گرنگترین ئارمانجێن مەیە
_دخوازن هەرئێكی بازرگانیێ‌ ب تایبەتمەندیا ئێزدیان بكت هزر ل پاشەرۆژێ‌ بكت
_دیتنا چارەیەكێ‌ بۆ شنگال دڤێت ب رازەمەندیا گشتی یا ئێزدیان بت
_ دڤێت لەز ل دانانا میرەكی نوو بۆ ئێزدیان بێتە كرن

بیرەوەریا 26ێ‌ یا دامەزراندنا بنگەهێ‌ لالش یێ‌ رەوشەنبیری و كۆمەلایەتی دەرباز دبت،ئەڤ بنگەه كو بوویە ئێك ژ مەزنترین دەزگەهێن جڤاكێ‌ سڤیل ب رێیا تایی و نڤیسینگەه و نوونەراتیان ب بزاڤێن هەمەجۆر ل پرانیا ئاستێن رەوشەنبیری و سیاسی و جڤاكی و دیتر.

ئەم پشتەڤانیا بێ‌ سنوور ژبال سەرۆك مەسعود بارزانی بۆ بنگەهێ‌ مە ژ رۆژا دامەزراندنێ‌ و هەتا ئیرۆ رۆژ بلند دنرخینین،دیسان سوپاسیا جەنابێ‌ نێچیرڤان بارزانی سەرۆكێ‌ حكومەتا هەرێمێ‌ دكەین بۆ پشتەڤانیا بەردەواما پێشكێشی بنگەهی دكت،دووپات دكەین كو بنگەهێ‌ لالش وێ هه‌ر بمینه‌ ئه‌و كانیا زەلال یا دهورتە درووبارێ‌ رەوشەنبیریا كوردی دا،و سەرباری بوویەرێن دژوار و ئالۆزی و ئاستەنگان ب تایبەت ل ڤان پێنج سالێن بۆری دا،بەلێ‌ بنگەهێ‌ لالش ب ستافێ‌ خۆڤە ئالا هه‌لگرێ‌‌ ئێزدیاتیێ د چارچۆڤێ كوردایەتیێ‌ دا،دهەمان دەم دا دەزگایەكی بهێز بوو ب ئالاڤێن خۆ یێن جودا جودا ب رێیا تۆرەكا پەیوەندیێن بەرفرەه لگەل رێكخراوێن ناڤخۆیی و هەرێمی و نێڤ دەولەتی و ب ئالاڤێن خۆ یێن راگەهاندنێ‌ یێن هەمەجۆر،و دەنگێ‌ خۆ بلندكر پێخەمەت قورتالكرنا خەلكێ‌ مە ل نەخۆشیا تێدا و هاریكاریكرنا ئاواران و كاركرن ب هەموو پێكۆلان بۆ رزگاركرنا گرتیێن ئێزدی ژ دەستێن هۆڤێن رێكخراوا داعش یا تیرۆرستی.

بنگەهێ‌ لالش دووپات دكت كو دۆسەیا گرتی و بێ‌ سەر وشوونێن ئێزدی پشتی دەست بسەرداگرتنا داعشێ‌ بۆ شنگالا وێرانكری،دێ‌ مینت ژ گرنگترین ئارمانجێن مە،و بێ‌ دەنگ نامینن و یا دشیانێن مە دا بت ل تەڤایا ئاستێن ناڤخۆیی و نێڤ دەولەتی ئه‌مێ بخه‌بتن بۆ رزگاركرنا هەر ئێكی مای،هەروەسا كارێ‌ مە بەردەوامە بۆ ناسكرنا كارەساتا بسەرێ‌ خەلكێ‌ مە دا هاتی كو تاوانا جینۆسایدێ‌ و كۆمكوژیا بكۆمە ب هەموو پیڤەران،دڤێت پێكۆلێن زێدەتر بكەین بۆ بدەستڤەئینانا دانپێدانا نێڤ دەولەتی ژبۆ هندێ‌ مافێ‌ كەسوكارێن قوربانیان بدەستڤەبێن و تیرۆرستێن ماین بێنە سزادان.

ئەم دبینن لسەر هەموو ئێزدیان ئه‌ركه‌ كار بۆ پاراستنا تایبەتمەندیا ئێزدیان دچارچۆڤێ‌ كوردستانی دا بكن،ژبەركو كوردستان وەلاتێ‌ ئێكێ‌ و داویێ‌ یێ‌ ئێزدیایە،و هەموو لسەر هەلویستێ‌ مرۆڤایەتی ژبال سەركردایەتی و گەلێ‌ كوردستانێ‌ ئاگەهدارن ل دەمێ‌ رۆژێن ئاوارەبوونا خەلكێ‌ مە بۆ گوند و باژێرێن هەرێمێ‌،كو بتری 300هەزار ئاوارێن ئێزدی هێش ل كەمپێن هەرێمێ‌ دژین و پێتڤی پشتەڤانیا بەردەواما ناڤخۆیی و نێڤ دەولەتی نه‌،ئەم دووپات دكەینە ڤە كو پاراستنا تایبەتمەندیا ئێزدیا ئەركێ‌ هەر ئێزدیەكی یە و دڤێت هەر ئێكی بازرگانیێ‌ بڤێ‌ تایبەتمەندیێ‌ دكت ژ دوور و نێزیك ڤە هزر ل پاشەرۆژێ‌ دا بكت،ژبەركو بەرژەوەندێن ئێزدیان لسەر بەرژەوەندێن كەسۆكی نە.

بێشك كو كێشا شنگال،كو كێشەیەكا ئێزدیان و كوردستانێ‌ و عێراقێ‌ بتنێ‌ نینە بەلكو بمخابنی ڤە بوویە كێشەیەكا نێڤ دەولەتی كو هندەك ئەجندەیێن نێڤ دەولەتی لسەر ئەردێ‌ شنگالێ‌ هەنە و هه‌ر ئێك ژبۆ بدەستڤەئانینا به‌رژه‌وه‌ندیێن خوه‌ ل ده‌ڤه‌رێ كار دكه‌‌،ئەم هەر رێگە چارەیەكێ‌ بۆ دۆزا شنگالێ‌ بێ‌ رازەمەندیا ئێزدیان ژ خەلكێ‌ شنگالێ‌ رەت دكەین چنكو ئەو به‌رژه‌وه‌ندی و پاشه‌رۆژا خوه‌ باشتر دزانن چاوه‌ گاڤا خوه‌ باڤێژن همبه‌ری هه‌می ئاسته‌نگان و چاوان بسەر بلندی و سەرفەرازی ڤەگەرنە دەڤەرێن خۆ ڤە و ب ئارامی و تەناهی بژین.

دووپات دكەین كو وەغەركرنا خودێ‌ ژێ‌ رازی میر تەحسین سەعید بەگ وەك روودانەكێ‌ بوو جڤاكێ‌ ئێزدی هەژاند و سەرباری هندێ‌ دخوازن لەز ل هەلبژارتنا میرەكی نوو بێتە كرن،ژبەركو گیرۆبوونا دانانا میری نە دبەرژەوەندا ئێكی دایە ل ئاستێ‌ ئێزدیان ب كێماتی.

دڤێت ئاماژێ‌ بدەینە پێكۆلێن هەموو تەخێن رەوشەنبیری و جڤاكی یێن ئێزدیان یێن كار و پشتەڤانیا بنگەهێ‌ لالش كرین هەر ژ دامەزراندنێ‌ وەرە و هاریكار بووین ل بزاڤ و چالاكیان و خورتكرنا بنەمایێن بنگەه لسەر هاتی ئاڤاكرن،هەروەسا ئاماژێ‌ ددەینە هەر ئێكی پشتەڤان بووی و پشتەڤانیا بنگەهێ‌ مە دكت كو ئێك ژ دەستكەفتێن بزاڤا رزگاریخوازا كوردستانێ‌ بوویە،دبێژن 26سالێن خەباتێ‌ پری دەستكەفت بۆراندن،بەلێ‌ رێیا كاروانێ ڤێ خه‌باتێ دوور و درێژه‌ وئەم هەلگرێن ڤی ئەركی نە ب هیمەتا ستاف و گەنج و پشتەڤانیا خەلك و هەڤال و حەژێكەرێن بنگەهێ‌ لالش.

ئازادی بۆ گرتیێن ئێزدی و سلاڤ بۆ جانگۆریان
سلاڤ بۆ گیانێ‌ پێشمەرگەیێن قارەمان
دەستەیا بلندا بنگەهێ‌ لالش یێ‌ رەوشەنبیری و كۆمەلایەتی/دهۆك
10/5/2019

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2018 by Lalish Media Network .   Developed by Ayman Qaidi.