گرنگیا ڤەكرنا مۆزەخانا دیرۆكی ل بارزان
دلۆڤان ئەمجەد بارزانی
مۆزەخانا یادگەها نیشتمانی یا بارزانی ل بارزان دناڤ مەزارێ نەمران دا اتە ڤەكرن ، ئەڤە چەند ساڵە كار ل سەر دئێتە كرن،ئەڤ مۆزەخانەیە باسێ پشكەكا دیرۆكی یا خەلكێ مە دكەت وان قەهرەمانان ئەڤێن گیانێ خۆ فیدایێ كورد و كوردستانێ كری،ژ پێخەمەت ئیرۆ كو ئەم بووینە خودان دەست كەفت و سەربەخۆ و ئازاد دژین، كا ل كێدەرێ دەست پێكریە و ئیرۆ گەهشتینە كێدەرێ و چ ئاست و ب چ گەهشتینە،ئەڤ شۆرەش و بەرخودان و قوربانیدانە هەموو ب شەڤەك و ڕۆژەكا چێ نەبوویە و وەسا ب ساناهی ژی بدەست مللەتێ كورد ڤە نەهاتینە،بێ قوربانی دان ژی نەبوویە، بێ ئێش و ئازار ژی نەبوویە،بێ خوون ڕێتن ژی نەبوویە،بێ برین و دەربازكرنا ڕێیێن سەخت و دژوار و پری ئاستەنگ ژی نەبوویە … گەلەكێن دی،بەلكو هەر بۆستەكا ئاخا پیرۆزا كوردستانێ ب خوونا پێشمەرگەهەكی، قەهرەمانەكی ،مێرخازەكی ،كورد پەروەرەكی و چاڤ نەترسەكێ وەلاتێ مە یا ئاڤا بووی.
ئەڤ مۆزەخانا یادگەها نیشتمانی یا بارزانی ب ڕەنگەكێ وەسا پێشكەفتی و سەردەمیانە یا هاتیە دروستكرن ، دەمێ مروڤ دچتە دناڤا ڤێ مۆزەخانا دیرۆكی دا وەسا هزر دكەت كو ئەمێن ناڤ وی دەمی دا یێ كو (بارزانیێ نەمر)دگەل هەڤالێن خۆ شۆرەش تێدا دكر ، مرۆڤ دچتە دناڤا كووراتیا دیرۆكێ دا و هەست ب زەحمەت و ئازارێن وی دەمی دكەت ، هەست ب هندێ دكەت كو چەندا ب ترس بوویە داوا ئازادیێ ل خوون مێژێن وی دەمی بكەی،شێوێ مۆزەخانێ ل سەر پێكڤەژیانێ یا چێكری،بارزان هەر دكەڤن دا جیێ پێكڤەژیانا هەموو ئۆل و مەزهەب و نەتەوا بوویە بێ جوداهی دبن سیبەرا ئێك ئالا و سەركردە دا دژیان،(مزگەفتا موسلمانا دناڤبەرا كەنیشتا جووهیان و كەنیسا مەسیحیان) دا بوو،مۆزەخانا یادگەها نیشتمانی یا بارزانی باس ل دیرۆكا مللەتێ كورد دكەت هەر ل سەردەمێ (شێخ عبدالسەلام بارزانی و شێخ احمدێ بارزانی “خودانێ بارزان” و مەلا مستەفا بارزانی “بارزانیێ نەمر،گوندێ بارزان زێدەیر ژ (16) جاران یێ هاتیە وێرانكرن و تۆپبارانكرن و دگەل عەردی یێ تەخت كری دوژمنێن كوردان.
دڤێ مۆزەخانا ب بهادا چەندەها دیمەنێن دیرۆكی یێن تێدا:ئێك ژوان ب نەخشە و ناڤێن جیاڤە ب ڕەنگەكێ عەمەلی و تەكنەلۆژیایی باسێ هندێ دكەت كو ل كۆمارا مهابادێ “بارزانیێ نەمر” و هەڤالێن دگەلدا بریار دای بچنە ئێكەتیا سۆفیەتێ ل روسیا، مەلا مستەفا بارزانی دگەل (503) ژ هەڤالێن خۆ ل مهابادێ ڕۆژهەلاتا كوردستانێ ڕێككەفتن ب لنگا بەرەف ئێكەتیا سۆفیەتێ و سنوورێ چەند دەولەتان ب لنگان بری كو (748) كیلۆمەتر د ماوێ (64) ڕۆژان دا ،دەربازبوون ل ڕووبارێ (ئاراس) و د ڕێ دا ڕووبەرووێ چەند هێرشان بوون ب ترس و برس خارنا وان بتنێ ئەو بوو یا دگەل خۆ بری د جەنتێن وان دا هەتا گەهشتینە جیێ مەبەست،د بەشەكێ دی دا جل و بەرگ و چەك و هەموو كەلوپەلێن بارزانیێ نەمر یێن تێدا كو هەر ئێك ژووان ژی دیرۆك و سەربۆرێن تایبەت هەنە د دڕێژاهیا خەبات و تێكۆشان و شۆرەشان دا یێت بكار ئینای ،هەتا ل سەر جل و بەرگێن بارزانیێ نەمر جیێن ساچمێن دوژمنا دیارن،گەلەك دیمەنێن دی كو ئەز نكارم هەموویان د گۆتارەكێ دا باس بكەم.
یادگەها نیشتمانی یا بارزانی دڤێت ببتە سەنتەرەكێ زانیاری و ڤەكۆلینان هەتا كو نفشێ نوو یێ داهاتی ژی وان ئازار و نەهامەتی و نەخۆشیێن بەرێ ژبیر نەكەن و بزانن كا چاوا گەهشتنە ڤێ ڕۆژێ،لەوما داخازێ ل هەموو گەنجان دكەم نفشێ نوو سەرەدانا مۆزەخانا یادگەها نیشتمانی یا بارزانی بكەن ل مەزارێ نەمران ل بارزان ، دا كو پتر ژ دیرۆكا كوردان بزانن دیرۆكا كوردستانێ ب ڕەنگەكێ باش و تاقیكاری ب چاڤێ خۆ ڤان دیمەنان ببینن هەست ب هەستا نیشتمان و كورد پەروەریێ بكەن،چنكو دڤێت ئەم دیرۆكا وەلاتێ خۆ ب باشی بزانین هەردەم ل پێش چاڤێت مە بت ،هەر كەسەكێ دیرۆكا وەلاتێ خۆ ب باشی نزانت و زانیاری ل سەر ئاڤابوونا وەلاتێ خۆ نەبت،قەدر و قیمەتا ئەڤ ئازادیا تێدا نزانت چ فەرقا وی دگەل كەسەكێ بیانی نینە.
ئەڤ یادگەهە راسپارد نامەیەكە ئاماژە ب مانەڤا گەلێ كورد دكەت و نامەیەكا بەردەوامیێ یە ل سەر پێكڤەژیان و ئاشتیێ نیشان ددەت،ئەڤ كەسێن سەرەدانا ڤێ مۆزەخانێ دكەن سەردانكەر و نڤیسەر دكارن ل ڕێژەیەكا زۆرا ژێدەران ل كتێبخانێ و مۆزەخانێ سود مەند بن،دگەل هەبوونا كتێبخانەكا ئەلیكترۆنی كو ل هەر جیەكی ئەڤێ جیهانێ دێ یا بەردەست بت.
هەر ل ڤێرە دا جیێ تایبەت یێ هاتیە دابینكرن بۆ سمینار و كۆنفرانس ، پێشانگەهان ، سەردانكەرێن یادگەها نیشتمانی دكارن گەشتەكێ دناڤا دیرۆكێ دا بكەن،دهەمان دەم ژی دا دكارن خۆشیێ ببینن ل جوانی و دیزاینا مودێرن و سەردەمیانەیا یادگەهێ كو ئاماژێ دكەت ب سەركەفتن و بەرخودانا سەدەها سالێن گەلێ كورد.
تُتاح هذه الصورة أيضا في: کوردی