پاقژڕاگرتن و پاراستنا ژینگەهێ د گەشت و سەیرانان دا
نایف محمود
د ڕۆژانێن وەرزێ بهارێ دا خەلكێ كوردستانێ وەك كلتۆر و نەریتەكێ سالانە یێ وەرزێ بهارێ ب مەبەستا گەشتكرنێ سەرەدانا سروشت و جیێن دلڤەكەر دكەن ئەوژی ژ پێخەمەت بۆراندنا دەمێن خۆش د هەمبێز و باوەشا كوردستانێ دا، هەلبەت سروشت و ژینگەها خوەزایی یا مە ب خۆ جیێن خۆش و سەرەنجڕاكێشن ئەوژی ب خەمل و دارو بارو ئاڤ و چیا و ڕوبارێن خۆڤە دجوانن كو ئەڤەژی نازو نیعمەتێن خودایینە بمە هاتینە دان، لەورا گرنگە ڤی ئەمانەتێ خودایی بپارێزین و ڕێزێ ب رێیا پاراستن و پاقژڕاگرتنا ژینگەها خۆ بگرین و وەك بیبلكا چاڤێ خۆ بپارێزین ئەوژی ژ بۆ هندێ سیمایەكێ جوان یێ شارستانی نیشا خەلكێ خۆ و خەلكێ ژ دەرڤەیی كوردستانێ ژی بدەین كو وەك ئەم گەلێ كورد خوەزیارێن ژینگەهــ پارێزی و جوانكرنا سروشتێ وارێ خوەینە.
ئەڤ سروشتێ جوان یێ مەهەیی هێژایی وێ چەندێ یە هەر یەك ژمە ب باخچێ مالا خۆ بزانت و چاڤدێریێ لێ بكەت ئەوژی ب ڕێیا وێ چەندێ ئەم هەموو پێكڤە فێری ژینگەهــ پارێزیێ ببین و ببینە مامۆستا و ڕێنیشاندەر بۆ زاڕۆك و گەشتیار و تەخێن جودایێن جڤاكی كو ئەڤ ژینگەهە مالا مە هەموویانە و نابت بێ ڕێزیێ د دەرهەقا ڤی سروشتێ ب خەمل و جوان دا بكەین، هەروەسا پیس كرن و هێلانا بەرمایكێن گلێشی و بەلاڤكرنا بەرمایكێن خوارن و زەرف و هەرتشتەكێ دی یێ دیمەنێ ژینگەهێ كرێت دكەت سروشتێ وەلاتێ مە پیس و نەجوان دكەت، ب ڕاستی دیاردەیەكا زۆر یا نەجوان و شەرمەزارە ب ناڤ چاڤێن هەركەسەكی ڤە یێ دبتە ئەگەرێ تێكدان و وێرانكرنا ژینگەهێ ب هەر ڕەنگەكی بت، ئەڤ چەندە بەرامبەر ژینگەهێ دچتە د خانا تاوان و سەرپێچیێدا! ئەڤجار ڕەوشەنبیریا پاراستن و پاقژ ڕاگرتنا ژینگەهێ ئەركێ مە هەموویانە و هەر ئەم ب خۆینە مفایی ژ ڤێ ژینگەهێ دبینن و كەیفا مە دناڤا ژینگەهــ و سروشتێ جوان یێ كوردستانێ دا دئێت، لەوران پاقژی و پاراستنا وێ ئەركە ل سەر مە هەموویان و تشتەكێ پیرۆز و گرنگە، چنكو سروشت ژی سامانەكێ نەتەوەیی یە.
تُتاح هذه الصورة أيضا في: کوردی
