ئازار 29, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

ئلیاس نعمۆ خەتاری:هەشت سال ل سەر فەرمانا ئێزدیان ل شنگالێ‌ دەرباز دبن

هەشت سال ل سەر فەرمانا ئێزدیان ل شنگالێ‌ دەرباز دبن
ئلیاس نعمۆ خەتاری


دڤان رۆژان دا هزر و بیر رادوەستن و هەموو پێكڤە دبنە رۆندك و ب ترس و خەفەت هێدی هێدی دئێنە خوار ل سەر وان روویێن بریندار و جارەكا دی دبێژینە هەموو جیهانێ‌ وەرن دا جارەكا دی بەرێ‌ خۆ بدەینە شنگال،داكو جارەكا دی بیرهاتنا رەش ل بیرا خۆ بینین مانە چەند رۆژ ماینە دێ‌ جارەكا دی بیرهاتنێن رەش ل بیرا مە ئێن و دێ‌ خەم و كول و كۆڤان نوو بنەڤە،لێ‌ دێ‌ بنە هەشت ساڵ ژ رەزیلیێ‌ و دەربەدەریێ‌، دێ‌ بنە هەشت سال و بارێ‌ مللەتی هەر ئەو رەوشا بەرێ‌ یە، دێ‌ بنە هەشت سال و چاڤێ‌ خەلكێ‌ ل سەلكێت خوارنێ‌ یە و دێ‌ بنە هەشت سال و هێشتا ئێخسیرێت مە د هندابووینە و هندەك ژی د گۆڕێن ب كۆم دا د ڤەشارتینە و هەستیكێن وان نەدیارن و چارەنڤیسێ‌ خەلكێ‌ مە هێشتا یێ‌ دیارنینە، دێ‌ بنە هەشت سال و هێشتا ئاگر ب چادران د كەڤن و برساتی و بێ‌ ئاڤی و بێ‌ كەهرەبی یە بەردەوامە، لێ‌ ئەز د ترسم هەشت سال بنە نەهـ و بتر و تشتەك دیار نەبت.

ئەرێ‌ هەتا كەنگی دێ‌ ئەڤ رەوشە یا وەسا بت، ئەرێ‌ مانە بەسە كوشتن و گرتن و فرۆتنا مرۆڤان و دەربەدەری و ئێختیماتی،ب خودێ‌ مللەتێ‌ ئێزدی ب گشتی و شنگالی ب تایبەتی گەلەك رەزیل بوون و باجا هەرە مەزن دان ئەڤە ژبلی رەڤینێ‌ بۆ دەرڤەی وەلاتی،ژئالیەكێ‌ دیڤە ئەگەر بیێن و بەرێ‌ خۆ بدەینێ‌ دێ‌ بینین سال بۆ سالێ‌ رەوشا خەلكێ‌ شنگالێ‌ خرابتر و نەخۆشتر لێ‌ دئێت و تشتەك وەكو پێتڤی بۆ وان نائێتەكرن،ل ئالیێ‌ دن بەردەوام چادرێن خەلكێ‌ پەریشان دئێنە سۆتن و گەلەك جاران سەر و مالێ‌ ئاوارێن بێ‌ گونەهـ دناڤدا دچن، بێی كو مفایەكی باش ژ بارودۆخێ‌ بەردەوامێ‌ خراب یێ‌ سیاسی وەرگرن چ ل كەمپێن ئاواران یان ژی ل سەر ئاخا شنگال یاكو كەس نزانت سەر ب كێدەر ڤەیە،توركیا بەردەوام شنگال تۆپباران دكت و هەر رۆژ بریارەكێ‌ ددەت ژبۆ هێرشكرنا سەر شنگالێ‌، ژ ئالیەكێ‌ دن ڤە شنگال ب چەند قایمقام و رێڤەبەرێن ناحیا ئەوێن هەردوو حكومەتێن بەغدا و هەولێر بخۆ دادنێن هەتا ئێرۆ رۆژ چەسپاندنا ئەڤی بابەتی نەجێگرە.
ل هێرە پرسیار ئەوە ئەرێ‌ دۆسەیا جینۆسایدا ئێزدیان چی لێ‌ هات و گەهشتیە چ قۆناغێ‌، ئەرێ‌ دێ‌ رۆژەكێ‌ ژ رۆژان ئێتە پەسەندكرن پشتی پەرلەمانتارێن یازدە دەولەتان یان بتر هەتا نۆكە پەسەندكرین،لێ‌ كەنگی دێ‌ دادگەها نێڤ دەولەتی ئەڤێ‌ جینۆسایدێ‌ وەسا یا مەزن پەسەند كەت و خەلكێ‌ ئێزدی ب گشتی و ب تایبەت شنگالی دێ‌ مفایەكی ژێ‌ وەرگرن و دێ‌ تەنابن كو جارەكا دن ئەڤ جۆرە فەرمان ب سەرێ‌ مللەتێ‌ وان نائێنەڤە و دێ‌ ژ ژیانا بن چاردان رزگاربن یان دێ‌ زڤرنە سەر جی و وارێن خۆ پشتی بێنە ئاڤاكرن و بارودۆخێ‌ وێ‌ ئێكلا بت و نەمینت گۆرەپانا ناكۆكیێن سیاسی،هەر چەند رۆژا جارەكێ‌ دبتە هاوار و قیریێن خەلكێ‌ مە ل سەر ڤێ‌ ئاخێ‌،هەر چەند رۆژان جارەكێ‌ هندەك كەسێن بێ‌ گونەهـ عەزیزێن دای وبابان دبنە قوربانی و هەرچەند رۆژان جارەكێ‌ هندەك ژ گوندێن خۆ باردكن و خەلك جی و وارێن خۆ بجهـ دهێلن لێ‌ ژبەر چی و بۆچی بۆ ڤێ‌ پرسیارێ‌ ئەم هەموو خۆ دكەینە بلیمەت و پرۆفیسۆر و هەر ئێك ژمە دكارت ب دەمژمێران باخڤت و گۆهدارێن خۆ گێژ بكت یان هەكە بنڤیسین دكارین ب سەدان لاپەران بنڤیسین،لێ‌ پرسیارا هەرە گرنك ئەوە كەنگی دێ‌ جیێن بەرپرسیار بریارا دەن و كەنگی سنۆرەكی بۆ ڤێ‌ دیاردا مەترسیدار دانن.
شنگال بەردەوام یا دئێتە تۆپبارانكرن،گوند و بیستان ل سنوورێ‌ توركیا دئێنە تۆپبارانكرن و چۆلكرن و ل سلێمانیێ‌ ژی هەروەسایە،ل هەولێرا پایتەخت و ل قەزا شێخان دیسان دئێنە مووشەك بارانكرن،لێ‌ یا بتر دەنگ ڤەدایی تۆپبارانكرنا گوندێ‌ بەرخێ‌ یێ‌ گەشت و گۆزاری بوو كو چەندین قوربانیێن گەشتیار یێن بریندار و كوشتی یێن بێ‌ گونەهـ،ئەرێ‌ هەتا كەنگی دێ‌ هۆسابت و هەتا كەنگی دێ‌ ئەڤ رەوش دێ‌ بێ‌ دەنگ بت، مەترسی ل سەر ژیانا خەلكێ‌ مە پەیدابوویە نزانن دێ‌ سوبەی كێدەرێ‌ ئێتە تۆپبارانكرن یان ل كیژ جی دێ‌ فرۆكێن جیناران تۆپان هاڤێژنە دەڤەرێن وان و تۆپباران كن.
ئەوا تیرۆرستێن داعش ل ( 3 ⁄ 8 ⁄ 2014 )ل بەرچاڤێن هەموو دنیایێ‌ ب سەرێ‌ مللەتێ‌ مە ئینایی و هەموو د شاشێن تلفزیۆنا و تۆرێن جڤاكی دا مە دیت كا چ فەرمان وجینۆساید ب سەرێ‌ مە هات و گەلەك یا مەزن بوو و دەمێ‌ ئەم دبینین خەلكێ‌ مە بەردەوام د پەریشانن و تشتەك بۆ وان نەهاتیە كرن،رامانا وێ‌ ئەوە كو فەرمان یا بەردەوامە و مللەتێ‌ ئێزدی بەردەوام وێ‌ باجا بی َخودانیێ‌ ددەن.
ل ئەڤێ‌ یادا دل تەزین رۆژا بیرهاتنا رەشە و هیڤی و داخوازیێن مە ئەون خەلكێ‌ مە ژبن چادران رزگار بن،و ل داویێ‌ دبێژم ل هەشت سالیا جینۆسایدكرنا ئێزدیان رەحما خودێ‌ ل روح و گۆڕێت جانگۆریان بن،هیڤیدارین ژ خودایێ‌ مەزن هەموو ئێخسیرێن مە رزگار بن و خەلكێ‌ مە ڤەگەرنە سەر جی و وارێن خۆ و دخوازین دەڤەرا شنگالێ‌ بكەفتە بن دەستێ‌ ئێك جیێ‌ فەرمی و خزمەتگۆزارێ‌ پەیدابن ب شێوەكی باش و گونجای،داكو ژیار و ژیان و ئێمناهیێ‌ لێ‌ پەیدا بن.

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi