رێورەسمێن چنینا زەیتوونان ل پەرستگەها لالش رامان و كەڤناری
مەهدی حەسەن موراد
د باوەریا ئێزدیان دا چرا نیشانا رۆژێ یە و ل پەرستگەها لالش (366) خەتیر و چرایێن خاس و باب چاكا دئێنە ڤێخستن ب زەیتا زەیتوونان،دارا زەیتوونێ ژی د باوەریا ئێزدیان دا یە پیرۆزە دبێژن دارا زەیتوونێ ب ئاڤا ئەیوانێ هاتیە ئاڤدان،لەوا هەر یە كەسكە هەر دوازدە هەیڤێن سالێ،هلكرنا ڤێ ژمارا چرایان ژی داكو رۆناهی ب شەڤ و رۆژ هەبت بۆ پەروەستەكرنا خودایێ مەزنە و رێورەسم دهاتنە كرن ژبەركو ل پەرستگەها لالش خاس و باب چاكێن سەردەمێ شیخادی ب شەڤ هەموویێ پەروەستە دبوون.
ژلایەكێ دی ڤە هلكرنا چرایان ژی نیشانا رۆژێ یە و بەردەوامیا ژین و ژیارا مرۆڤی یە ب شەڤ و رۆژ ، ئەڤ ژمارا چرایا ژی (366) و رامانا وێ ژی رۆژێن سالێ یە و هەر فتیلەك لسەر بنەمایێ رۆژەكێ ژ سالێ و دئێنە ڤێخستن هەتا سال تەمام دبت،ل لالشا نوورانی ل چیایێ عەرەفاتێ دارێن زەیتوونان هەینە ل ڤی دەمێ سالێ ل داویا هەیڤا یازدە (11)یە یا زاینی هەر سال كەسێن شكەستی یێن مالا شیخادی و چلەگر و كەسایەتیێن ئۆلی و خێرخوازێن ئێزدی ژن و زەلام ئەڤێن دڤێن خێرەكێ بكن بۆ مالا شیخادی قەستا لالش دكن بۆ پشكداریا ڤێ خێرا پیرۆز بۆ ماوێ هەفت رۆژا ئەڤ چنین ب رێورەسم دئێتە ب رێڤەبرن ئەو ژی پشتی بابێ چاویش یان شكەستیەكێ مالا شیخادی فرمانێ د دەت كو دەست ب چنینێ بكن و سێ جاران ب دەنگەكێ بلند گازی دكت و دبێژت (هێ وەرنە خێرا چنینا زەیتوونا) ژ نوو هەموو پێكڤە ب دەستووری ناڤێ خودێ و ب رێورەسم دەستبكار دبن و هەتا هەر هەفت رۆژ ب داوی دئێن و ل داویا كاری دێ هەموو زەیتوونان خرڤەكن ل خزینەكێ هەتا هەیڤا سێ ل بەهارێ ل رۆژێن(16_17_18)ێ ل ژمارا رۆژهەلاتی دێ جارەكا دی ڤان زەیتوونان هەموویان ب رێورەسم و ب ئامادەبوونا بابێ شێخ و جڤاتا رۆحانی و هەموو شكەستی و خێرخوازێن ئێزدی دێ دەست ب دەرئێخستنا ڤان زەیتوونان كن و جارەكا دی دێ پاقژكەن و ب ئاڤا كانیا سپی پاك و تەمیز كەن و دێ كەنە زەیت بۆ چرایێن لالش و دڤێت ئەڤ زەیتا ژ زەیتوونێن گەلیێ لالش بن.
یا خاسا رەسلە
مە ل پێ فەسلە
نەقلا ل پێ نەقلە
*************
هنجیێ خلمەتا مالا ئادیا بكەت ژ دلە
دێ بتە مراز حاسلە
وەكی مەندێ شریف و مەندێ تۆكلە
ئەم دكێمن و خودێ یێ تەمامە
ژێدەر:
دیدار دگەل مامۆستا پیر خەلات ئەلیاس نڤیسەر و كەسایەتیێ ئاینی
پێزانین ژ مامۆستا جەهوەر مشمە زانایێ ئاینی هاتینە وەرگرتن
تُتاح هذه الصورة أيضا في: کوردی