جینۆسایدا ئێزدیان و ھندەك تشتێن دی…
عه‌لى عه‌ونى
بابەتێ رونشتاندنا زارۆکەکا ئێزیدی لسەر کورسیا سەرۆکێ حکومەتا عێراقێ ژ لایێ مستەفا کازمی ڤە ، گەکەک ھاتە مەزن کرن و نیشاندان . پێدچیت وەک زەڵامەکێ راگەھاندنکار ژ لایەکی و ھەواڵگری ژ لایێ دیڤە ، کازمی یارییەکا راگەھاندنی دکەت و شارەزای ڤێ لەیزینێ یە . زیراعێن وی ژی ل کوردستانێ و عێراقستانێ ژ لایێ راگەھاندنیڤە حەشرێ بۆ دکەن بۆ جوان نیشاندانا وی . دەرکەفتنێن وی تا نھۆ زێدەتر ژ وێ کو دەرکەفتنێن سەرۆکێ حکومەتێ بن، زێدەتر شبتی شۆمەن و پۆپۆلیستانە .
کازمی ھەر ژ دەستپێکێ یێ کەمپینا خۆ یا ھەلبژاردنێن داھاتی بڕێڤە دبەت . راگەھاندن و دەرکەفتنێن وی تا نھۆ چو ئاریشەیەک چارە نەکرینە .ئەوا کو ئەز دبینم زێدەتر پرۆپاگەندێن ھەلبژاردنێنە.
زارۆکا ئێزیدی لسەر کورسیا سەرۆکێ وەزیران رونیشیت یان لسەر ئەردی ؛ چ ژ حالێ ئێزیدیان دگوھۆڕیت؟
١- ھەتا نھۆ حکومەتا عێراقێ ئەڤ فرمانە وەک جینۆساید ناس نەکرییە .
٢- ھێشتا خەلکێ شنگالێ دناڤ خیڤەتگەھان دایە و نەزڤڕینە سەر جی و وارێ خۆ . حکومەتا عێراقێ نەک مەسرەفا ژیان و تەندروستی و ئاکنجی کرنا شنگالیان ناگریتە ستویێ خۆ بەلکو دۆرپێچا دارایی ژی دانایە سەر حکومەتا کوردستانێ و ئەڤ بارێ گران مایە لسەر ملێ ھەرێمێ ب تنێ .
٣- قەرەبۆیا زیان ڤێکەفتی و قوربانیێن ھێڕشێن داعشێ ل شنگال و دەشتا نەینەوا ( باشیک و بەحزانی و … ) نەھاتییە کرن .
٤- حکومەتا عێراقێ بەرپرسیارەتیا خۆ ژ سستی و بێخەمیا لھمەمبەر پاراستنا وڵاتیێن ئێزیدی ب فەرمی ب ستۆڤە نەگرتیە.
٥- تا نھۆ حکومەتا عێراقێ قەرەبۆیا قوربانیێن کیمیابارانا ھەلەبجە و بادینان و ئەنفالێن بارزان و گەرمیانێ ب ستۆڤە نەگرتیە . ئەڤە د دەمەکی دایە کو عێراق ھەیڤانە قەرەبۆیا دەولەتا کوێتێ دکەت.
٦- تا نھۆ شنگال تژی ملیشیایێن شیعە و پ ک ک یە. د ھەماندەم دا ھەبوونا پێشمەرگەی ل شنگال و کەرکووک و مەخمورێ قەدەغەیە.
٧- تا نھۆ دور و نێزیک جەنابێ کازمی لبەر نینە تەعریبێ راوەستینیت . چنکو ئەڤرو ژی ل دوزخورماتۆ عەرەب ئانینە سەر گوندێن کوردستانیان .ژ خۆ ھەر مادەیا سەد و چل و پێنجی مادەیێن دی یێن دەستوری ( کو راستەەخۆ یا ناراستەوخۆ گرێدای ژیانا کوردستانیانە ) د چو حیسابەکا سەرۆک وەزیراندا نینە.
٨- پێویست بوو ئەو کەسێن نەھێلاین پێشمەرگە چەکدار ببیت ب چەکێن پێشکەفتی ، ھاتبانە دادگەھی کرن ، چنکو ئەو بوونە ئەگەر چەکێ ناتۆ بکەڤیتە دەستێ داعشێ و پێشمەرگە ب چەکێ سڤک نەشیا بەرسینگێ دڕندەیان بگریت.
نھۆ دپرسم ئایا باشترە کازمی ڤان کێشەیان چارەسەر بکەت یان ڤێ زارۆکا خێرنەدیتی بۆ چەند خولەکان دانێتە سەر کورسیا خۆ ؟!
ئایا بۆ نەتەوەیێن ھەڤگرتی باشتر نەبوو ل شوینا خەلاتێ نۆبێلێ بدەتە نادیا مورادێ، نابێژم کوردستانا سەربخۆ چێکەت ، بەلکۆ خەلکێ ژێر خیڤەتان ب ئاشتی و سەربلندی ڤەگەڕینن شنگالەکا ئاڤەدانا دوور ژ ملیشیایێن پ ک ک و حەشدا شەعبی و گەف و گوڕێن بومبارانا تورکان ؟!
جەنابێ کازمی دەمێ حەملەیا ھەلبژاردن و کەمپینان نینە .
تُتاح هذه الصورة أيضا في: کوردی
