بەهرەمەند پێتڤی ب پشتەڤانیێ نە
تۆرا لالش:
نازێ ئیسماعیل،ئێك ژ كچێن خودانا بەهرەیا هۆنەرێ شێوەكاری یە و تابلۆیان ل سەر بابەتێن جیاواز دروست دكەت،ئارمانجا وێ دیمەنێن ل فەرمانا سالا 2014 یێن ب چاڤێن خۆ دیتین بكەتە وێنە و نیشا خەلكەكی بدەت، د دیدارەكێ دا بۆ رۆژناما دەنگێ لالش خویاكر كو چەندین خودان بەهرە ل ناڤا كەمپان دا هەینە،لێ ژبەر نەبوونا پشتەڤانیێ بەهرەیێن وان دمرن.
نازێ خەلكا قەزا شنگالێ یە و قوتابیا پۆلا دوازدێ ئامادەیی یە،دیاركر،هەر ژ زارۆكینیا خۆ دا حەزا وێنە كێشانێ هەبوویە و من دڤیا تابلۆیان ل سەر بابەتێن جیاواز چێكەم،لێ پشتی فەرمانا بسەرێ ئێزدیان دا هاتی ل سالا 2014 ل سەر دەستێ ڕێكخراوا داعش یا تیرۆری من ڤیا وان دیمەنێن ب چاڤێن خۆ دیتین بكەمە تابلۆ و ب رێیا هۆنەرێ خۆ ئەوان ئێش و ئازاران نیشا خەلكەكی بدەم،لەوما ل سالا 2018 دەست پێكر و هەتا نۆكەژی كاریە گەلەك تابلۆیان ل سەر برینێن شنگال دروست بكەم.
ئەوێ دا زانین،ل دەستپێكێ كارێ من یێ ب ساناهی نەبوو چەندین ئاستەنگ ژی دیتن هەتا كاری خۆ پێشبێخم و پشتی سەركەفتنا دكاری دە بۆ ماوێ 12 هەیڤان دگەل ڕێكخراوەكێ كاركر و بتر ژ سەد تابلۆیان ل سەر ئاشتیێ و ئازارێن شنگال نەقشاندن،سەرەرای ڤەكرنا خۆلەكا شێوەكاریێ یا بێ بەرامبەر بۆ كچێن تەمەنێ وان 15هەتا20سالیێ،ژبلی فێركرنا چەندین زارۆیان یێن سەرەدانا مالا من دكەن.
ناڤهاتیێ گۆت:چەندین خودان بەهرە ل ناڤا كەمپان دا هەینە،لێ ژبەر نەبوونا جیێن پشتەڤانیێ بەهرەیێن وان دمرن،لەوما داخواز دكەم هاریكاریا وان بێتە كرن داكو بكارن بەردەوامیێ ب كارێ خۆ بدەن و كارەكێ باش پێشكێشی جڤاكی بكەن.
تُتاح هذه الصورة أيضا في: کوردی
