ئازار 29, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

لیوا عەبدولخالق تەلعەت: ئەڤ سالە دێ پێنگاڤ بۆ ئاساییكرنا ڕەوشا شنگالێ هێنە هاڤێتن

لیوا عەبدولخالق تەلعەت: ئەڤ سالە دێ پێنگاڤ بۆ ئاساییكرنا ڕەوشا شنگالێ هێنە هاڤێتن

ئەڤرۆ نيوز:

بەرپرسەكێ ئەمنی یێ حوكمەتا هەرێما كوردستانێ ئاشكراكر، هەرێم و بەغدا یێن گەهشتینە ڕێككەفتنێ بۆ پاراستنا سنۆرێن هەرێما كوردستانێ دگەل وەلاتێن دەوروبەر و دبێژیت، شەش هزار پۆلیس دێ هێنە دامەزراندن هەروەسا گۆت ژی، ئەم چاڤەڕێی بەغدا دكەین بۆ بجهئینانا رێككەفتنا شنگالێ و هەرێما كوردستانێ یا ڕژدە ل سەر ئاساییكرنا ڕەوشا شنگالێ و ڤەگەڕاندنا خەلكێ وێ یێ ئاوارە.

لیوا عەبدولخالق تەلعەت، نوونەرێ وەزارەتا ناڤخوە و پێشمەرگە ل بەغدا بۆ ڕۆژنامەیا (ئەڤرۆ) گوت» بڕیارە شەش هزار پۆلیس بۆ پاراستنا سنۆرێن هەرێما كوردستانێ بهێنە دامەزراندن و دگەل بەغدا گەهشتینە ڕێككەفتنێ كو بەهرا زێدەتر یا ڤێ دامەزراندنێ بۆ گەنجێن پارێزگەهێن هەرێما كوردستانێ بن، چونكە دێ ئەركێ پاراستنا سنۆرێ هەرێما كوردستانێ دگەل وەلاتێن ئیرانێ و توركیا وەرگرن، بەری نوكە چەندین جاران شاندێن ئەمنی یێن بەغدا لسەر ئاستێن بلند سەرەدانا هەرێما كوردستانێ كریە و شاندێن هەرێمی ژی چووینە بەغدا بۆ چارەسەركرنا ئالۆزیێن سنۆری و بڕیار هاتیە دان شەش هزار كەس بهێنە دامەزراندن، بڕیارە پشتی پەسەندكرنا پڕۆژە قانوونا بودجەیێ ئیراقێ پرۆسەیا دامەزراندنا وان شەش هزار پۆلیسان بهێتە دەستپێكرن و ب گۆرەی مەرج و ڕێنمایێن لەشكری دێ وەلاتی هێنە وەرگرتن، ئەز باوەرم هەر پشتی پەسەندكرنا بودجەی دێ دامەزراندن هێتە دەستپێكرن و هەر وەلاتیەكی مەرج تێدا هەبن ماف هەیە بهێتە دامەزراندن، ب گۆرەی پلانا هەڤپشك د ناڤبەرا بەغدا و هەرێما كوردستانێ دا هەتا دوماهی خالا سنۆری دێ خالێن زێرەڤانیێ هێنە جهگیركرن و نابیت ڤالاهی ل سەر سنۆری بمینیت، ئەڤەژی دێ بیتە ئەگەرەكێ سەرەكی بۆ پاراستنا سنوورێ هەرێما كوردستانێ دگەل وەلاتێن دەوروبەر وئێدی ئاریشە وئالۆزیێن هندە سالە ل سەر سنۆری هەین نامینن یان دێ هەتا ڕادەیەكێ باش هێنە چارەسەركرن و خەلك ژی دێ مفاداربیت هەم دێ ڤەگەڕن بۆ دەڤەرێن خوە هەم ژی دێ وەكو پۆلیسێن سنۆری هێنە دامەزراندن».

لیوا عەبدولخالق ئەوژی گوت» هەماهەنگیێن باش هەنە دناڤبەرا بەغدا و هەرێمێ دا ل دۆر ئاریشەیێن سنۆری، ئەڤەژی خالەكا باشە بۆ وێ چەندێ ئەو ئالۆزیێن بەرێ نەمینن».

ل دۆر ڕێككەفتنا شنگالێ ئاماژەكر» هەردو حوكمەتێن هەرێما كوردستانێ و فیدڕال ل دۆر ئاساییكرنا ڕەوشا شنگالێ بەری نوكە یێن گەهشتینە ڕێككەفتنێ، بەلێ بجهئینانا خالێن د ناڤا ڕێككەفتنێ ئەركێ حوكمەتا فیدڕالە و پێدڤیە ئەو كار بكەت بۆ دەركرنا هێزێن نە شەرعی ژ شنگالی، چونكە هەتا ئەو هێز ل شنگالێ بمینن بێگومان ڕەوشا شنگالێ ئاسایی نابیت و خەلكێ ئاوارە نەشێت ڤەگەڕیتە سەر مال و حالێن خوە، بڕیارە بۆ ئاساییكرنا ڕەوشا شنگالێ هەم هێزێن نە شەرعی بهێنە دەركرن هەم ژی هێزەكا پۆلیسان بهێتە پێكئینان ژ خەلكێ خوەجهێ شنگالێ بۆ پاراستنا ڕەوشا ئەمنی ل شنگالێ، بەلێ مخابن هەتا نوكە ڕێككەفتن نەهاتیە بجهئینان و ئەم چاڤەڕێی بەغدا دكەین ئەڤ سالە خالێن د ناڤا ڕێككەفتنێ دا بهێنە بجهئینان و هەرێما كوردستانێ یا ڕژدە ل سەر بجهئینانا وێ ڕێكەفتنێ بۆ ڤەگەڕاندنا خەلكی، بەردەوام ئەم یێ بزاڤان دكەین بەغدا پێگیر بیت ب ڕێككەفتنێ و ئەز باوەرم ئەڤ سالە دێ پێنگاڤ بۆ ئاساییكرنا ڕەوشا شنگالێ هێنە هاڤێتن».

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi