ئێزدی بەرهەڤیێن گێڕانا ڕێورەسمێن جەژنا ڕۆژیێن ئێزی دكەن
تۆرا لالش:
مللەتێ ئێزدی هەر ژ كەڤندا هژمارەكا جەژن و هەلكەفتان هەیە،زۆربەیا جەژنێن ئێزدیان گرێدایی سروشتی نە جەژنا رۆژیێن ئێزی ژی ئێك جەژنێن كەڤنار یێن مللەتێ ئێزدی یە،دكەفتە ئینیا ئێكێ ژ مەها كانوونا ئێكێ،پشتی ئێزدی سێ ڕۆژان ب ڕۆژی دبن ڕۆژا چارێ دبتە جەژن.پیر خەلات ئەلیاس،ئێك ژ ئۆلدارێن ئێزدی بۆ رۆژناما دەنگێ لالش دیاركر،دئاینێ ئێزدیان دا ڕۆژی گرتن ئانكو بۆ خودێ یە لدووڤ بیرو باوەرێن ئێزدیان ئێك ژ فەرزێن حەقیقەتێ یە ،دەمێ نێزیكبوونا ڕۆژیان هەموو مالێن ئێزدیان بەرهەڤیێن خۆ دكەن دەمێ بەری بتە سبەیك ئێزدی رادبن دەست و چاڤێن خۆ دشۆن خۆ پاك و تەمیز دكەن كابانیا مالێ رادبت پاشیڤەكێ دروست دكەت شكاندنا نەفسا خۆ ل هەمبەر خودێ ئەو كەسێ ب ڕۆژی ژ دل و ب ئیمان ب ڕۆژی بت ب چاڤ یێ كۆرە بت و ب زمان یێ لال بت دەمێ ڕۆژ دچتە ئاڤا كابانیا مالێ پاشیڤەكێ دروست دكەت ئەو كەسێ ب ڕۆژی بت دەست و چاڤێن خۆ دشۆت خۆ پاك تەمیز دكەت دەست ب دوعایا خۆ دكەت بەری فتارێ بكەت ب بەراتەكێ یان پاریەكێ نانی زیارەتی دبت دبێژت(یاخودێ تو ڕۆژیا من قەبول بكەی).
هەروەسا گۆت:ئێزدی ژبلی ڕۆژیێن ئێزی هژمارەكا ڕۆژیێن دی دگرن هەر كەسەكێ بڤێت بۆ خۆ خێرەكێ بكەت ل پێش ڕۆژیێن ئێزی ڕۆژیان دگرت بۆ نموونە(ئەگەر كەسەك كارێ وی یێ دوور بت یان سەر رێیەكێ بكەڤت بۆ خوداوەندێ رێ(غەفورێ رێیا)دگرت،جۆتیار بۆ خوداوەند(حەسەن كەیال)دگرن،كەسانێن خوەندەڤان بۆ خوداوەندێ پێنوسێ(مەلك شێخەسەن)دگرن،ئێكی مرازەك هەبت بۆ خوداوەندێن مرازا (مەهمە رەشان) یان (مەم شڤان) یان (شێبل قاسم)دگرن،بەری ڕۆژیێن ئێزی ب هەفتیەكێ ڕۆژیێن خوداوەندێ مالێ نە هەر مالەك ب ڕۆژی دبت بۆ خوداوەندێ مالێ ئەو ڕۆژی خێرن نە فەرزن.
ئۆلدارێ ئێزدی دیاركر،ئیسالە جەژنا ڕۆژیێن ئێزی دكەفتە ڕۆژا(16/12/2022)،ل هێڤارا ڕۆژیێن ئێزی ل رۆژا دووشەمبوویێ هەر مالەكا ئێزدی ل دووڤ بارێ خۆ یێ ئابووری سەربرەكێ سەر ژێ دكەن ژبۆ ڕۆژیان ڕۆژا(سێ شەمبوویێ و چار شەمبوویێ و پێنچ شەمبوویێ)ب ڕۆژی دبت ڕۆژیا سێیێ دبتە هێڤارا جەژنێ كابانیا مالێ ژبەر خەریبیا كەس و كارێن خۆ یێن وەغەركری دچتە زەهمانی هژمارەكا شریناهیا و خوارنەكێ دبەتە سەر گۆڕێن مریێن خۆ ل زەهمانی ل سەر ئەوان شریناهیا و نانی سەر ئێك ودوو بەلاڤ دكەن داكو نانێ وان تێكەلی ئێك بت.
پیر خەلات خویاكر ژی ل ڕۆژا جەژنێ زەلامێن گوندی هەموو دچنە بەر مەزارگەهێ گوندی جەژنا ئێك و دوو پیرۆز دكەن و هەر كەسێ ئاریشەك هەبت خاترا جەژنێ ئەوێ ل ئێك و دوو دبۆرن،پاشان زارۆك و گەنج مال ب مال دناڤ گوندی دا دگەرن جەژنا هەڤال و گوندی و كەس كارێن خوۆ پیرۆز دكەن.
مللەتێ ئێزدی هەشت جەژن هەنە ڕێورەسمێن پێنچ جەژنا دناڤ جڤاكێ ئێزدی دا دئێنە گێڕان،سێ ژێ ل پەرستگەها لالش دئێنە گێران پێنچ ژوان جەژنا ڕۆژی بۆ دئێنە گرتن،لێ ئەو ڕۆژی تنێ گرێدایی بابێ شێخ و زەلامێن ئۆلی یێن ئێزدیایە،لێ زۆربەیا ئێزدیان ژی وان ڕۆژیان دگرن.
تُتاح هذه الصورة أيضا في: کوردی
