قایممقامێ شنگال:90%خێزانێن ل ناڤا كەمپان نەڤێن ڤەگەرن
تۆرا لالش:
قایممقامێ قەزا شنگالێ راگەهاند،ل دووڤ ڕاپۆرتێن ڕێكخراوێن نێڤ دەولەتی،هێشتا ب ڕێژەیا 90%خێزانێن دناڤ كەمپان دا حەز و نیاز نینە و نەڤێن ڤەگەرنە سەر جی و وارێن خۆ یێن رەسەن ل شنگال.
نایف سەیدۆ،قایممقامێ قەزا شنگال ب وەكالەت بۆ دەنگێ لالش ئاشكەراكر،پشتی بۆرینا هەشت سالێن ئاوارەیێ ل كەمپێن ئاواران ل هەرێما كوردستانێ،هێشتا پشكەكا مەزن یا خەلكێ شنگالێ دڤێن دناڤا كەمپاندا بمینن بێ كو ڤەگەرنە دەڤەرێن خۆ یێن رەسەن ژبەر چەند ئەگەرێن جودا جودا ئەو ژی هندەك ب كاری ڤە گرێداینە و دبت دەلیڤا كاری بدەست نەكەڤت دەمێ ڤەدگەرت و گرێدانا كوڕێن چەندین خێزانێن ئاوارە ب قوتابخانێ و كولیژە و دەوامێن حكومی ل هەرێما كوردستانێ و هندەكان ژ وان خانی نینە ل دەڤەرا وی بپارێزت و پتریا خانیێن خەلكێ شنگال ئاخن و دگەل بۆرینا دەمی ب تەمامی ژناڤچووینە و ب كێر ئاكنجیبوونێ نائێن و هندەكان نەڤێن ڤەگەرن ژبەر بەرقرار نەبوونا رەوشا سیاسی و هەڤركیێن هەرێمی و نێڤ دەولەتی و هێزێن نەشەرعی و ژ دەرڤە و گۆت:((بەریا چەند ڕۆژان ڕاپۆرتێن ڕۆژنامەڤانی ل دۆر ئاواران دایە دیاركرن و ژوانا ڕاپۆرتا ڕێكخراوا(ریتش)یا نێڤ دەولەتی یا گرێدایی ب لڤینا ئاواران،كو ڤەدیتنەك ل كەمپێن ئاواران ل هەرێما كوردستانێَ ئەنجام دایە و ڕاپۆرتێ خویاكریە كو ب ڕێژەیا پتر ژ 90% خێزانێن دناڤ كەمپان دا حەز و نیاز نینە ڤەگەرنە سەر جی و وارێن خۆ یێن رەسەن ل شنگال،ژبەر ئەگەرێن گرێدایی ب ئێمناهی و ئارامی و نەبوونا دەلیڤێن كاری،زێدەباری زیانێن ب خانیێن وان كەفتین و چەند ئەگەرێن دیتر)).
قایممقامێ قەزا شنگال رۆنكر ژی سەرباری كێمیا پێشكێشكرنا هاریكاریێن مرۆڤی ل ڤی ماوێ بۆری دا ژبال ڕێكخراوێن نێڤ دەولەتی و خۆڤەكێشانا هندەكان و ڕاگرتنا كارێ خۆ ل كەمپان،لێ ئاواران دڤێن بمینن ژبەر وان ئەگەرێن مە ئاماژە پێكری و زێدەباری ژ دەستدانا باوەریێ ب سۆزێن حكومەتا ناڤەندی چ دۆسەیا ئاڤەدانكرنێ یان تەناهی بت،یا گرنگتر دۆسەیا قەرەبووكرنێ كو وەلاتی هەست ب بێ هێڤیبوون و بێزاریێ دكەت ژبەر پێرابوونێن رۆتینی یێن ئالۆز بۆ پێشكێشكرنا مامەلەیەكێ بۆ بدەستڤەئینانا قەرەبوویا خۆ.
ل داویێ ژی دیاركر،كو یا ب زەحمەتە چارەسەریێن راستەقینە بۆ كێشەیێن جڤاكا شنگالیان بێنە دیتن،بتنێ ب ڕێیا بجهئینانا ماددا140ژ دەستوورێ هەمیشەیێ عێراقێ و دێ بتە كلیلا چارەكرنا چەندین كێشەیان،هەروەسا ئێك ژ سادەترین مافێ مرۆڤان ئەوە بریارێ ل سەر چارەنڤیسێ خۆ بدەت لدووڤ یاسایێن نێڤ دەولەتی.
تُتاح هذه الصورة أيضا في: کوردی