بنگەهێ لالش پیرۆزباهیێ ل دەزگەهێ خێرخوازیێ بارزانی دكه
ب هەلكەفتا بیرەوەریا پازده سالیا دامەزراندنا دەزگەهێ خێرخوازیێ بارزانی گەرمترین و جوانترین پیرۆزباهیان ئاراستەی سهرۆكاتیا دەزگەهی و تەڤاهیا كارمەندێن ڤی دەزگەهێ مرۆڤی یێ پێشەنگ دكەین،یێ كو پشتەڤانیا هاوارهاتن و ئاهێن خوارنێ و لوجستی پێشكێشی ب سەدان هەزار ئاواران ل هەرێما كوردستانێ و ئاوارە و كۆچبەرێن پارێزگەهێن دی یێن عێراقێ كری.
بێگۆمان،دەزگەهێ خێرخوازیێ بارزانی پێشەنگ بوو بۆ پێشكێشكرنا دەستێ هاریكاریێ بۆ ئاواران هەر ژ رۆژا رەش ل 3ی تەباخا 2014ێ ل چیایێ شنگال،و هەتا ئیرۆ رۆژ بەردەوامە لسەر ڤان جۆرە هاریكاریان،بەلكو هندەك تیم و كارمەندێن ڤی دەزگەهی ل رێیا دناڤبەرا دهۆك و شنگال دا ئاهێن خوارنێ پێشكێشی كەسێن ڤەدگەرنە شنگالا بریندار دكن،ئەڤە هەست و هەلویستێ جوان توو جاران ئەم ژبیر ناكن.
ئەم دەستخۆشیێ ل سهرۆكاتی و هەموو كارمەندێن دەزگەهێ خێرخوازیێ بارزانی دكەین و سوپاسی و پێزانینێن خۆ پێشكێش دكن بۆ هەلویستێ وان یێ مرۆڤی لگەل ئێزدیان ل دەمێ رۆژانێن نەخۆش دا،و ئەم بڤێ پشتەڤانیێ مەندەهۆش نەبوونە،ژبەركو ئەڤ دەزگەهە هەلگرێ ناڤێ بارزانیێ نەمر و لدوڤ پەیرەوێ وی یێ مرۆڤایەتی دچە بۆ پشتەڤانیا بندەست و زەرەرمەندان.
سەركەفتن بۆ دەزگەهێ خێرخوازیێ بارزانی و سالڤەگەرا وە پیرۆز بە.
دەستەیا بلندا بنگەهێ لالش یێ رەوشەنبیری و كۆمەلایەتی/دهۆك
5ی تەباخا 2020
تُتاح هذه الصورة أيضا في: کوردی