هه‌موو به‌رهه‌ڤى بۆ گێڕانا ڕێوره‌سمێن جه‌مايا شه‌رفه‌دين ل شنگالێ هاتينه كرن، كو بڕياره سبه‌ى ب ڕێڤه‌بچت و ب هزاران كه‌س دێ به‌شدارى ڕێوره‌سمان بن.
ئيسماعيل به‌حرى، مجێورێ مه‌زارگه‌هێ شه‌رفه‌دين ل شنگالێ، ئيڕۆ 3ـى ئه‌يلوولا 2025، بۆ تۆرا لالش گۆت: ب به‌شداريا ب هزاران كه‌سان سبه‌ى پێنج شه‌مبوويێ ڕێوره‌سمێن جه‌مايا شه‌رفه‌دين دێ ئێنه گێڕان و هه‌موو به‌رهه‌ڤى هاتينه كرن.
ده‌رباره‌ى ڕێوره‌سمان، مجێورێ مه‌زارگه‌هێ شه‌رفه‌دين دبێژت: ل ڕۆژا ئێكێ ئانكو پێنج شه‌مبوويێ زادێ خێرێ بناڤێ شيلانا شه‌رفه‌دين دئێته چيكرن و ڕێوره‌سمێن ئۆلى نائێنه كرن بتنێ دڤێ ڕۆژێ دا خه‌ڵك سه‌ره‌دانا مه‌زارگه‌هى دكه‌ن و كۆمڤه‌دبن و پيرۆزباهيێ ل هه‌ڤدوو دكه‌ن.
ئيسماعيل به‌حرى گۆتژى: ل ڕۆژا ئينيێ كو دبته ڕۆژا دووێ يا جه‌مايێ ڕێوره‌سمێن ئۆلى ب لێدانا ده‌ف و شبابا ب ئاماده‌بوونا زه‌لامێن ئۆلى و خلمه‌تكاران ب ڕێڤه‌دچن و په‌ريا مۆردكه‌ن، ل دانێ پشتى نيڤرۆ ژى كه‌سێن به‌شدار ئاهه‌نگێن كه‌يفخۆشيێ لبه‌ر ده‌نگێ دهۆل و زرنايێ دگێڕن.
بۆ زانين مه‌زارگه‌هێ شه‌رفه‌دين دكه‌فته باكورێ ڕۆژهه‌لاتێ چيايێ شنگالێ و دووه‌م پيرۆزترين مه‌زارگه‌هـه ل نك ئێزديان پشتى په‌رستگه‌ها لالش.
ل ده‌مێ هێرشا ڕێكخراوا داعش يا تيرۆرستى بۆ سه‌ر شنگالێ ل 3ـى ته‌باخا 2014، مه‌زارگه‌هـ بنگه‌هێ به‌رخودانا ئێزديان بوو به‌ره‌ف سه‌نگه‌رێن شه‌ڕى مل ب مڵێ هه‌ڤڕا بۆ به‌ره‌ڤانيكرنێ ژ چيايێ شنگالێ و ئێزديان.
تُتاح هذه الصورة أيضا في: کوردی
