300خێزانێن ئاوارهیێن شنگالێ بۆ كهمپا كهبهرتوویێ دئێنه ڤهگوهاستن
تۆرا لالش یا راگههاندنێ:
رێڤهبهرێ كۆچ و كۆچبهران و بهرسڤدانا قهیرانان ل پارێزگهها دهۆكێ راگههاند،نێزیكى 300خێزانێن ئاوارهیێن شنگالێ ل سالا 2014ێ قهستا گوندێ سێجى سهر ب قهزا سێمێلێ كرن و دناڤ ئاڤاهیێن نهتهمامكرى دا دژین،ئهڤ خێزانێن ئاواره بۆ كهمپا كهبهرتوویێ دێ ئێنه ڤهگوهاستن.
پیر دهیان جهعفهر،رێڤهبهرێ كۆچ و كۆچبهران و بهرسڤدانا قهیرانان ل پارێزگهها دهۆكێ بۆ باسنیوز راگههاند،پڕۆسهیا ڤهگوهاستنا ئاوارێن ناڤ كاڤلێن ئاڤاهیێن گوندێ سێجى سهر ب قهزا سێمێلێ ل ڤان رۆژان دێ دهست پێ كت بۆ ناڤ كهمپا كهبهرتوویێ،ل وێدهرێ جه بۆ ڤان ئاواران هاتیه دابینكرن،ههر ئاوارهیهكى بڤێت دێ ئێته ڤهگوهاستن و ب حهز و ئارهزوویا وان ئهڤ كاره دئێته كرن،بۆ هندى زێدهتر هاریكارى بگههنێ و خزمهتا خهلكێ ئێزدى بێته كرن.
ئاشكهراكر ژى ل كهمپا كهبهرتوویێ ل سنوورێ دهۆكێ ژلایێ رێكخراوهكێ ڤه خیڤهت بۆ ئاوارێن ناڤ كاڤلێن ئاڤاهیێن گوندێ سێجى هاتینه دابینكرن و 300 خێزان دێ ئێنه ڤهگوهاستن بۆ ناڤ كهمپێ،دوپاتكر ژى كو ئاوارێن شنگال چاڤهرێ بجهئینانا رێككهفتنا دناڤبهرا حكومهتا ههرێما كوردستانێ و حكومهتا فیدرالا دا دكن بۆ ئاساییكرنا رهوشا شنگالێ،بهلێ ههتا نۆكه ب هیچ شێوهیهكى ئهو رێككهفتن نههاتیه بجهئینان،گهلهك جاران ب نڤیسارێن فهرمى داخوازا بجهئینانا وێ رێككهفتنێ ل بهغدا كریه،بهلێ بهغدا بهرسڤێ نادهت.
ژلایهكێ دى ڤه جههوهر عهلى بهگ،وهكیلێ میرێ ئێزدیان بۆ باسنیوز راگههاند،ئهڤه ههشت ساله خهلكێ شنگالێ ئاوارهنه و ههتا نۆكه بهغدا نكاریه ئاسایش و ئاڤهدانیێ بۆ شنگال دابین بكت و خهلكێ زهرهرمهندێ شنگال قهرهبوو بكت،هیڤیدارین بهغدا دهست ب رێكارێن بجهئینانا رێككهفتنا ناڤبهرا حكومهتا ههرێما كوردستانێ و حكومهتا فیدرال بۆ ئاساییكرنا رهوشا شنگال بكت،چنكو ئهڤ رێككهفتنه كلیلا چارهسهركرنا رهوشێ شنگالێ یه، ههتا نۆكه ب ههزاران خێزانێن ئێزدى لهناڤ خیڤهت و كاڤلان دا ژیانا خۆ دهرباز دكن،لهوا خهلكێ شنگال پێتڤى ب پشتهڤانى و هاریكاریێ ههیه و پێتڤیه بهغدا خۆ ل ههمبهر ئاوارێن شنگال بێدهنگ نهكهت.
س.س
تُتاح هذه الصورة أيضا في: کوردی
