نێچیرڤان بارزانی: پشتەڤانیا ئازادیا رۆژنامەگەری و رادەربرینێ دکەین
گاڤ نیوز
د یادا 124 سالیا رۆژا رۆژنامەگەریا کوردی و دەرکەفتنا ئێکەم رۆژنامەیا کوردستان ژ ئالیێ مێقداد مەدحەت بەدرخان ڤە پەیامەک بەلاڤ کر و پیرۆزباهیا هەمی رۆژنامەڤانان کر.
نێچیرڤان بارزانی د پەیاما خۆ دا نڤیسیە،”د ڤێ رۆژێ دا ب رێزڤە یادا وان هەمی رۆژنامەڤانان دکەین یێن د هەمی قوناغان دا خزمەتا وان بۆ کوردستانێ بوویە و ل سەردەمێ شورش و پشتی ئازادیێ ژی ب کارامەیی و پیشەیی ئەرکێ خۆ کری و هندەک ژ وان ژی ژبۆ وێ خزمەتێ سەرێ خۆ دانایی”.
هەروەسا نڤیسیە،”د ڤێ هەلکەفتێ دا پشتەڤانیێ ل دیمۆکراسی، ئازادی، ئازادیا رۆژنامەڤانی و رادەربرینێ، مافێن مرۆڤی و سەروەریا یاسایێ دکەین کو بنەمایێ سەرەکی یێ هەر کۆمەلگەهەکا ئازاد و پێشکەفتی یە و گەلێ کوردستانی ژبۆ وێ خەبات کریە و خوین و گیان بۆ کرینە قوربانی، ژ بەر ڤێ یەکێ ب چ رەنگان دەستبەرداری وان نابین و وەک هەردەم دێ پارێزگاریێ لێ کەین”.
سەرۆکێ هەرێمێ نڤیسیە ژی،”هەر د ڤێ یادێ دا تەکەزیێ ل گرنگیا رۆژنامەگەری و ئەرکێن رۆژنامەڤانان دکەین کو هەردەم کارامەیی و پیشەیبوونێ لبەرچاڤ وەربگرن، ئەرکێن خۆ ب بەرپرسیارانە و ب دروستی بکەن، ب وژدان راستیان وەک خۆ رابگەهینن، بەرژوەندیا بلندا وەلاتی لبەرچاڤ وەربگرن، ب رەخنەیێن ئاڤاکەر و تێبینی و سەرنجێن خۆ هاریکاریا دامودەزگەهێن نشتیمانی بکەن”.
تُتاح هذه الصورة أيضا في: کوردی
