نێچیرڤان بارزانی: دڤێت په‌كه‌كه شنگالێ چوول بكه‌ت
WAAR-دهۆک:
سه‌رۆكوه‌زیرێن هه‌رێما كوردستانێ دگه‌ل سه‌رۆككۆمارێ توركیا كۆمبوو و راگه‌هاند؛ بۆ دووباره‌نه‌بوونا روودانا شنگالێ، دڤێت په‌كه‌كه وی باژاركی چوول بكه‌ت.
ل گۆری مالپه‌رێ حكومه‌تا هه‌رێمێ، دوهی ل كوچكا یلدز مابه‌ین ل سته‌نبۆلێ، ره‌جه‌ب ته‌یب ئه‌ردۆغان سه‌رۆككۆمارێ توركیا، پێشوازی ل نێچیرڤان بارزانی سه‌رۆكوه‌زیرێن هه‌رێما كوردستانێ و ئاشتی هاورامی وه‌زیرێ سامانێن سرۆشتی یێ حكومه‌تا هه‌رێمێ كرییه و كۆمبوونێ بۆ ده‌مێ چلۆ پێنج خوله‌كان ڤه‌كێشا و دوور ژ چاڤكێن كامیره و راگه‌هاندنێ هاته كرن، تێدا ئه‌ردۆغانیی دلگرانیا خوه ژ شه‌هیدبوونا ژماره‌یه‌كا پێشمه‌رگه‌یان ل شنگالێ نیشاندا و ئاماژه‌كر كو ئه‌و روودان ب شاشی بوویه و نابیت په‌كه‌كه د شنگالێ دا بمینیت و ئاماده‌ییا وه‌لاتێ خوه بۆ هه‌ر هاریكاریه‌كا بریندارێن پێشمه‌رگه‌ی نیشاندا.
هه‌روه‌سا باسێ پیشڤه‌برنا په‌یوه‌ندیێن توركیا و هه‌رێمێ كرن و گۆت: وه‌لاتێ وی بهایه‌كێ مه‌زن د ده‌ته په‌یوه‌ندیێن خوه دگه‌ل هه‌رێما كوردستانێ و دخوازن ئه‌و په‌یوه‌ندییه برفره‌هـ تر بن و دازانین كو ئارامیا كوردستانێ ژبۆ وان گرنگه.
ژ ئالیێ خوه‌ڤه سه‌رۆكوه‌زیرێن هه‌رێمێ دلگرانیا خوه ژ روودانا شنگالێ كو تێدا ژماره‌یه‌كا پیشمه‌رگه‌یان شه‌هید و بریندارببوون، نیشاندا و بۆ دووباره‌نه‌بوونا وێ روودانێ ژی، هیڤی خواست په‌كه‌كه شنگالێ چوول بكه‌ت.
دا زانین ژی، حكومه‌تا هه‌رێمێ ئاماده‌یه ژ هه‌موو روویان ڤه په‌یوه‌ندیێن خوه دگه‌ل توركیا پێشڤه‌ببه‌ت و ده‌رباره‌یی كێشه‌یێن دگه‌ل به‌غدا ژی گۆت: هه‌رێمێ هه‌موو ده‌مان خواستییه، كێشه‌یێن خوه ب دانوستاندنان چاره بكه‌ت.
تُتاح هذه الصورة أيضا في: کوردی
