پێتڤیە خێزان زارۆكی ژ جڤاتێن خێزانى دوور بكت
تۆرا لالش یا راگەهاندنێ/جوان بەرواری
دەمێ خێزان گەنگەشێ ل سەر كاودانێن قەیرانان دكت پێتڤیە زارۆكی ژ وێ جڤاتێ دوربكت،دەمەكێ گونجای دانێت بۆ زارۆكی كو یێ پر بت ژ پرۆگرامێن تەلەڤزیۆنی گرێدایی بابەتێن زارۆكان بت،ژبەركو پەیدابوونا ڤان قەیرانان دژوارترین بارودۆخە دژی دەروونێ زارۆكی.
مامۆستا چنار دبێژت:”ئەڤ سەروبەرێ نهۆ ئەم تێدا سەروبەرەكێ گەلەكێ هەستیارە تایبەت دكاودانەكا وەكی ڤان دووسالان دا،هەردیسان پەیدابوونا ڤان قەیرانان دژوارترین بارودۆخە دژی دەروونێ زارۆكی،لێ یا پێتڤی ئەوە ئەم ل سەر زارۆكێن خۆ هایداربین نەهێلین كارتێكرن ل مێشك ودەروونێ ڤان زارۆكان بت،ئەگەر ئەم بەرێ خۆ ب دەینێ نەبوونا مووچان ئاریشێن مالێ زێدەكرینە لێ سەرەرای وێ چەندێ زارۆكی رۆژانە پێتڤیێن خۆ دڤێن لێ ئەگەر ئەم ب شێوەیەكێ نەشرین رەفتارێ ل گەل بكەین و پێتڤیێن وی بجه نەئینین،بێ گۆمان دێ فشارا دەروونی یا وی زێدەتر لێ ئێت،لێ ئەو پێتڤی ب رەفتارەكا دلۆڤانەیە ودووركرنێ یە ژڤان ئاریشان”.
د.نەوال ئەحمد ڤەكۆلەرا دەروونی یە دیاركر:”هەر نوویاتیەكا دژینگەها زارۆكی دا پەیدابت دێ كارتێكرنێ ل دەروونا زارۆكی كت،لەورا قەیران ژی ئێك ژ وان نوویاتیانە كو زارۆك نكارت خۆ دگەل بگونجینت و شلۆڤەكرنەكا باش بدەتێ ودێ ئێكسەر هەست ب نەئارامیێ و بێزاریێ كت دێ بتە مێهڤانا هەستێن وی،چنكو دێ هەست ب كێماسیێ كت و پەیوەندیێن وی یێت جڤاكی دێ بەرەف كێمبوونێ ڤە چن وئاستێ خووندنا وی ژی دێ بەرەف لاوازیێ رێك كەفت، ژلایەكێ دیڤە ئەگەر قەیران بۆ دەمەكێ درێژ بەردەوام بوو دێ بتە پالدەر بۆ ئاڤاكرنەكا شكەستی دناڤ دەروونێ زارۆكی دا،ژبەركو زارۆك نكارت خۆ بكەتە هەڤالێ قەیرانان و وی دەمی دێ هەموو هیڤیێت خۆ ب مەزنان ڤە گرێدەت”.
دەربارەی رێیە چارەیان ژی د.نەوالێ گۆت:” ل سەر مەزنان پێتڤیە دەستپێكێ ئەو ئارامیا دەروونی ل نك خۆ پەیداكن،داكو زارۆك و هەست ب كارتێكرنێ نەكن و زارۆك هەول دەت دەربرینێ ژوی تشتێ گوهلێ بووی بۆ مە بەحس بكت ودلێ خۆ ڤە كت،داكو ئەو كەسێن دەوروبەرێت وی هەولبدەن گەشەكێ تەناترو ئارام تر بۆ دابین بكن ،هەروەسا دەمێ خێزان گەنگەشێ ل سەر كاودانێن قەیرانان دكت پێتڤیە زارۆكی ژ وێ جڤاتێ دوربكت ،دەمەكێ گونجای دانێت بۆ زارۆكی كو یێ پر بت ژ پرۆگرامێن تەلەڤزیۆنی گرێدایی بابەتێن زارۆكان بت وهەستا وی زارۆكی بكەتە خۆشی،داكو مێشكێ وی تێكەلی وی بارودۆخی نەبت و دەروونێ وی نەگەهتە پاشەرۆژەكا لاواز و مری”.
تُتاح هذه الصورة أيضا في: کوردی
