ئیرۆ چارشه‌مبوویێ 16ـی ته‌مموزا 2025ێ، وه‌زاره‌تا سامانێن سروشتی ل حكومه‌تا هه‌رێما كوردستانێ ڕاگه‌هاندنه‌ك ل دۆر هێرشێن درۆنێن بۆمبرێژكری ل سه‌ر كێلگه‌هێن سنوورێ پارێزگه‌ها دهۆك و ئیدارا سه‌ربه‌خۆ یا زاخۆ به‌لاڤكر.
د ڕاگه‌هاندنێ دا هاتیه: سبه‌یكا ئیرۆ چارشه‌مبوویێ ب رێیا درۆنێن بۆمبرێژكری ژماره‌یه‌كا هێرشێن تیرۆرستی بۆ سه‌ر كێلگه‌هێن نه‌فتا تاوكێ و پێشخابوور و عین سفنێ ل ئیدارا سه‌ربه‌خۆ یا زاخۆ و قه‌زا شێخان یێن ب سه‌ر پارێزگه‌ها دهۆكێ ڤه هاتنه ئه‌نجام دان، هه‌رچه‌نده د هێرشان دا زیانێن گیانی نه‌بووینه، به‌لێ زیانێن مه‌زن كرینه سه‌ر ژێرخانێن وان كێلگه‌هێن نه‌فتێ.
وه‌زاره‌تا سامانێن سروشتی ب تووندی “ئه‌ڤان هێرشێن تیرۆرستی ئیدانه و شه‌رمه‌زار دكه‌ت”، و ئاماژێ ب وێ چه‌ندێ دكه‌ت مه‌به‌ست ژ هێرشان “لێدانه ل ژێرخانا ئابووری یا هه‌رێما كوردستانێ و دروستكرنا مه‌ترسیێ یه ل سه‌ر سلامه‌تیا كارمه‌ندێن مه‌ده‌نی یێن كه‌رتێ وزێ”.
وه‌زاره‌تا ناڤبری بانگه‌وازیا هه‌موو لایه‌نێن په‌یوه‌ندیدار ل حكومه‌تا فیدرالی و جڤاكا نیڤده‌وله‌تی دكه‌ت “بۆ پاراستنا گیانێ كارمه‌ندێن مه‌ده‌نی و ئه‌منی یێن وزێ و بۆ رێگریكرنێ ل ڤان هێرشان بۆ سه‌ر كه‌رتێ وزا كوردستانێ، ب زووترین ده‌م وه‌رنه سه‌ر خه‌ت”
وه‌زاره‌تا سامانێن سروشتی رژدی ل سه‌ر وێ چه‌ندێ كریه، ئه‌م هه‌موو هه‌وله‌كا خۆ بۆ پاراستنا گیانێ كارمه‌ندێن وزێ و پێگه‌هێ ستراتیژیا خۆ بۆ دابینكرنا سه‌قامیگریا وزێ ل ناڤچه‌یێ و جیهانێ دێ ده‌ین.
تُتاح هذه الصورة أيضا في: کوردی
