تۆرا لالش
چەندی ئەم د قارین
دەستا ل سنجەقێت شیخادی بگرین
دا ل سەر باوەر و ئیمانا خۆ بمرین
*********
چەندی ئەم د فێمینین
دەستا ل سنجەقێت شیخادی ب وەرینین
دا سەر باوەر و ئیمانا خۆ بمینین
تاووسگێران ئەركانەكا خودێ ناسیێ یە ل جەم ئێزدیان، تاووس ئێكە ژ نیشانێن ئێزدیان ل ساڵە 1116 زایینی دگەل هاتنا شیخادی بۆ ناڤ ئێزدیان هەفت تاووس دگەل خو ئیناینە و هەر تاووسەك یا تایبەت بوو بۆ دەڤەرەكا ئێزدی نشین ڤه.
تاووسا عەنزال بۆ مێرگەها شیخادی، تاووسا ئێزدی بۆ مێرگەها میر شەرفەدین ل شنگالێ، تاووسا حەلەبێ و شامێ بۆ وەلاتێ سوریا، تاووسا خالتا بۆ دەڤەرا خالتا ل تركیا، تاووسا زۆزانا بۆ دەڤەرا هەكارێ ل تركیا، تاووسا مسقوفیا بۆ ئەرمینا و جۆرجیا و رووسیا، تاووسا تەورێزێ بۆ ئیرانێ، پشتی شەرێ جیهانیێ ئێكێ و فرمانێن ب سەر ئێزدیان دا هاتین و نەمانا دەستهەلاتا ئێزدیان ل وان وەلاتان، نهۆ بتنێ دوو تاووس ل دەڤەرێن ئێزدیان دهێنە قوناغ كرن ئەوژی تاووسا عه‌نزه‌ل و تاووسا ئێزی.
واتا بتنێ لجەم ئێزدیێن عیراقێ دهێنە قوناغ كرن، مەرەم ژ هاتنا تاووسێ بۆ ناڤ ئێزدیان ئەوه یا ئێكێ ئێزدیێن ل دەڤەرێن دووری لالشێ ندكاری بێنە لالشێ زیارەتی ببن له‌وران ل تاووسێ زیارەتی دبوون، یا دووێ ژ سەردەمێن كەڤناردا بۆ چارەسەكرنا ئاریشێن جڤاكی و كۆمەلایەتی یێن دناڤ ئێزدیان دا هه‌ین تاووس دهاته گێران.
دەمێ تاووسێ ل گوندەكی قوناغ دبت ئەو كەسێن د چنە پێشوازیا تاووسێ دڤێت پێخواس بن، چونكی تاووس شونا هاتنا شیخادی یە بۆ ناڤ ئێزدیان واتە نیشانا هاتنا خێر و بەرەكەتێ یە. ژ سەردەمێن كەڤنار دا سالێ دوو جاران دهاتە قوناغ كرن، ل وەرزێ بەهارێ و وەرزێ پایزێ، بەلێ نهۆ بتنێ ل وەرزێ بەهارێ دهێتە قوناغ كرن، سەرجەمێ وان كەسێَن دگەل تاووسێ دگەرێن 10 كەسن، 6 قەوالن و مجێورێ شیخادی و مجێورێ كانیا سپی و قهوە جی و نەقیبێ قەولان و ئه‌ركێ هەر كەسەكی ژ وان یێ تایبەتە ب كارەكی دیار كری ڤە.
قەوال ژ سێ هۆزێن ئێزدیان پێك دهێن (هەكاری و ماموسی و دوملی)نە، جوداهی دناڤبەرا تاووسی مەلك و تاووسێ ئەوا، دمیتۆلوژیا ئێزدیان دا هاتی یە خودێ هەفت فریشتە ژ نورا خوە ئافراندن و تاووسی مەلك سەروەرێ وان فریشتەیە، تاووس نیشانەكە ژ نیشانێن پیرۆز یێن ئێزدیان، نیشانێن ئێزدیان مینا: هلێل، بەرات، تاووس…… هتد.
هەژی گۆتنێ یە چرایەك دگەل گەرا تاووسێ دهێتە گێران دبێژنێ چرایێ مەعریفەتێ، دەمێ رۆژئاڤا بوونێ ژ 5 فتیلا پێك دهێت دهێتە گوری كرن و هەر فتیلەك ئاماژەیەكا بۆ ناڤەكی دیاركری، ئێزدی دبێژن تاووس تاووسێن شیخادی نە.
تُتاح هذه الصورة أيضا في: کوردی
