بنگەهێ لالش ژ نەبوونێ بۆ پێدڤیەکا ئێزدیاتیێ
سەگڤان شنگالی
جڤاکا ئێزدی ب تایبەتی و یا کوردستانی ب گشتی ب دەستێ رژێمێن بەردەوام و یەک ل پێ یەک یێن عێراقێ د نالاند و ب هاتنا هەر حکومەتەکا نوی رە یاسایێن تەپەسەرکرنێ یێن دژوارتر دهاتنە چەسپاندن ل سەر ڤێ جڤاکێ، بێ گومان ئەڤێ چەندێ ژی لایەنێ کەلتووری و چاندی ژی ب خۆڤە دگرت کو ئێزدیاتی وەکە ئۆلەکا کەڤنار ب بیر و باوەرێن خوە و هەبوونا کەلتورەکی مەزن یێ جڤاکی و فۆلکلۆری پێدڤی ب کۆمکرن و ڤەکۆلینێ بوو، بەلێ دبن دەستهەلاتداریا رژێمێن عێراقێ دە ئەڤ چەندە کارەکی گەلەک زەحمەت بوو، دکارم بێژم کو خەونەکا نەبووی بوو.
بەلێ ب سەرهلدانا گەلێ کوردستانێ یا سالا 1991 و دامەزراندنا حکومەت و پەرلەمانێ کوردستانێ ئەڤ خەونە هێدی هێدی بەر ب راستیەکا مێژووی ڤە دچوو
چونکی ب ئەنجامێ سەرهلدانێ گرنگی ب پێکڤەژیان و هەموو پێکهەتەیان هاتە دان، ژ ڤێ چەندێ ژی رەوشەنبیرێن ئێزدیان یێن وی وەختی ب دەلیڤە زانین بنگەهەکی رەوشەنبیری یێ ئێزدیا ڤەکن، پشتی چەندین دان و ستاندنا دگەل سەرکرداتییا وی وەختی یا کوردستانی بنگەهێ لالش یێ رەوشەنبیری و کۆمەلایەتی و ب دروشمێ ( لالش کانیەکا زەلالە د هورتە د روبارێ رەوشەنبیریا کوردی دا ) ل 12ی گولانا سالا 1993 هاتە دامەزراندن، هەر ژ وی وەختی هەتا نهۆ گرنگی دایە کۆمکرنا تێکستێن ئۆلی یێن ئێزدیان و فۆلکلۆر ئانکو ب رامانەکا بەرفرەهتر هەر تشتی گرێدای ئێزدیان خوە لێ کرییە خودان، دەست دایە کۆمکرن و ڤەکۆلین و شرۆڤەکرن و پاراستن و ئەرشیفکرنا وان.
ئەڤ چەندە ژی ب درێژیا 31 سالان و گەلک جاران ل بەرامبەر ئاستەنگێن مەزن کاریە کانیا ئۆلا ئێزدیان ب زەلالی بهێلت و هەروەسان ژ ئەنجامێ هەبوونا بنگەهێ لالش گەلەک ڤەکۆلەر و نڤیسکارێن دەڤەرێ و بیانی کارینە مفا ژ بەرهەم و بەرهەڤکریێن بنگەهـ وەربگرن و ب ڤێ چەندێ ژی جڤاکا ئێزدی ژ نێزیکڤە ناس بکن.
تُتاح هذه الصورة أيضا في: کوردی
