عـیـدا جـەمـایـێ د ئـێـزدیـاتـیـێ دا
پیر خەلات ئەلیاس
هەر سال عیدا جەمایا شیخادی ژ 6 /10 هەتا 12 /10 بۆ هەفت رۆژان تێتە گێران ل پەرستگەها لالشا نورانی.
رێ و رسمێن عیدا جەمایێ:
هەر هەفت رۆژا بەیتا هێڤاری و بەیتا جندی و بەیتا سبێ تێنە گۆتن و هەر هەفت هێڤاران سەما تێنە کێشان ئەوژی ئەڤەنە :
1- سەما یا شێشمس
2- سەما یا شەرفەدین
3- سەما یا قانونی
4- سەما یا زەرزایا
5- سەما یا بلند
6- سەما یا شێشمس
7- سەما یا قانونی ، بەلێ بۆ زانین دوو سەما تێنە دوو بارەکرن سەمایا شێشمس و سەمایا قانونی .
هەر هەفت رۆژا سمات تێتە چێکرن ژ ئالیێ خێر خواز و مجێوران ڤە بۆ ئامادەبوویێن سەرەدانا لالشا نورانی کری.
ل رۆژا پێنجێ پەریان سواردکەن.
ل رۆژا شەشێ قەباغە دێ گایەکی بەنە بەر شێشمس کەنە قوربانی.
ل رۆژا هەفتێ دێ بەرێ شباکێ سوارکەن و فراڤینا عیدی تێتە چێکرن ژ ئالیێ میرێ ئێزدیان ڤە.
هەر وەسا ل رۆژا عیدێ خەلاتێن شێشمس تێنە دان بۆ هەر کەسێ ل بەر شێشمس ئامادەبت ل رۆژا عیدێ و ژ ئەدەبێ دینی دبێژت:
مالێت بابا دوورن
ژێلی مسرێ ل پشت هەفت بەحرێت کوورن
خەلاتێت شێشمس ل سەر ملێت مێرا ب نوورن.
سەرەدانێت مللەتێ ئێزدی بۆ لالشا نورانی ئەرکەکی ئۆلی یە و دناڤا وی ئەرکێ ئۆلی دا رێ و رسمێن پیرۆز یێن هەین دگرێدایی جەژن و عید و هەلکەفتانە:
هەر کەسێ بێتە لالشێ ل دەسپێکێ دێ چتە پرا سەڕا تێ و سێ جاران دێ بلەز تێرا دەربازبت و دێ هەڤرازبتە هندرویی لالشێ و دێ چتە بەر غەفورێ رێیا و دێ بەرەف کانیا سپی چت و دێ تووافبت و دێ چتە کۆلانا خێرێ و دێ کەفتە سووکا مەعریفەتێ و دێ چتە بەر بەرێ هەقیێ و عەدالەتێ و دێ گەهتە دەریێ میر ئامادین و دێ تووافبت و دەربازی هندرووبت و دێ چتە بەر دەریێ قابیێ دەریێ شیخادی و زیارەتی بت و دێ زنجیرا خۆ بەتە سەری یا زیارەتبوونێ ل جەلسا شیخادی و جەلسا شێخ فەخر و دێ بەرف نیشانگەهێن شێخ و پیر و مەرەبی و ئاخرەتا خۆ چت و توواف بت و هەر نیشانەکا بگەهتێ و لێ توواف بت خێرە و سەخیەتا باوەریێ و ئیمانێ یە.
دباوەریا ئایینێ ئێزدیایێ دا هەر کەسێ بەرەف لالشا نورانی هەرت دڤێت چۆنا وی یا خێرێ بت و خۆ گونەهبار و پۆشمان نەکەت و یەفەرە ئەم بزانین هندەک دچنە لالشێ بۆ خێرێ و ل شوندا گونەهبار دبن.
کەسێ بڤێت ل خێرێ و ئیمانێ بێتە نڤیسین ئەو کەس دێ ئەرکێ ئیمانێ و بکارئینت:
1- دێ بێ دەنگیێ پارێزت و هاژی خۆ و زمانێ خۆ هەبت ل لالشێ هەر تشتێ بێتە زمان دێ لسەر وی تۆماربت لەوما بێ دەنگیێ پارێزن.
2- ژ ئالیێ جل و بەرگە دێ خۆ پارێزت و بێ سەر و بەر نابت دا گەزندەیێن مجێورا و خلمەتکار و کۆچەک و فەقرایێن لالشێ ژێ نێنە کرن و دوعا یان لێ بکەن.
3- شەڤی بوون ل لالشا نورانی نەبت ژ سوبێ هەتا هێڤاری سەرەدان و زیارەت بوون بەسە و ب تنێ میر و جڤاتا روحانێ و خلمەتکار و مجێورێن خاس و باپچاکان دمینن و شەڤی دبن ئەوژی ژبەر رێ و رسمێن ئۆلی و دوعا و درۆزا و پێشوازیا خەلکێ و مریدێن خودانێت خۆ.
4- زرنا و زەمبەرا و دیلان نەهاتینە قەبولکرنە ب هەر ئاوایەکی دبنە گونەهباری ، ب تنێ دەف و شباب هاتینە قەبول کرن و ل رۆژا بەرێ شبایکێ ڤەگەرێتە باشیک و بەحزانێ هنگی گۆڤەندا دەرێ کانیا سپی تێتە گێڕان ئەوژی دوو جارن جارا بەرێ گۆڤەندا خلمەتکارێن لالشێ یە و جارا دوویێ گۆڤەندا کابانیایە و دێ هەر کەسەک ڤەگەرێتە مالا خۆ و دێ گەهتە خێرێ و ئیمانێ.
5- لالشێ جهێ عیبادەتێ و مەعریفەتێ یە و دڤێت ئیسان مەعریفەتێ بکەت و رێزێ ل هەر کەسی بگریت و بتە پالدەرێ خێرێ و تفاق و تەبایێ ب رێیا مەعریفەتێ.
6- هێڤی و داخوزا ژ خودێ وان خاس و باپچاکان بکە و بۆ خودێ دەست ب سجوودێ و عیبادەت بکە ل لالشا نورانی و ژ ئەدەبێ دینێ ئێزدیان دایە دیارکرن و دبێژت:
یە حەرامە سەلەف و دزی و دەرەوو
و کوشتن و زنا و خون و خەبەردان ژ نەبوو
و یێ ژ بلی خودێ را سجوودە بوو .
ئەڤ سەبەقە دەتە دیارکرن و دبێژت:
سجوودە بۆ خودێ یە و سەرێ سەرا هەر خودێ یە و خۆ پارێزن ژ کوشتنێ ژ زنایێ ژ دەرەوێ ژ نەبوویێ ژ ربایێ ژ دزیێ ..هتد … .
ژ ئەدەبێ دینێ ئێزدیان دەتە دیارکرن و دبێژت:
حەجاجۆ نەچە ب حەجێ دە
کالکا نە قەتینە ب رێ دە
حەج ئەوە مالا تو تێ دە.
هەکە حەجاج چۆنە حەجێ و ڤەگەریانە مالە
و هەکە ژێک ڤە نەکرن حەلال و حەرامە
حەجا وان کری ژبنی یە بەتالە .
هەر وەسا ژ ئەدەبێ دینێ ئێزدیان دەتە دیارکرن و دبێژت:
ئەز چۆمە لالشا نورانی
من سەرێ خۆ ب وان قوب و هلێلا دانی
یا شیخادی تو ب کل و عەمەلێت مە دزانی.
رامان ژ ڤێ سەبەقێ دبێژت:
هەر کەسێ هەرتە لالشا نورانی ب دلەکێ پاک و ب رەوشت و ئەدەب و سنیات دێ لجەم خودێ و شیخادی بۆرا ب خێر ئێتە قەبول کرن .
بەلێ مخابن بۆ هەر کەسێ هەرتە لالشا نورانی و دلێ وی نەی پاک بت و بێ رەوشت و ئەدەب و بێ سنیات بت و ل زمانێ خۆ بێ هەفسار بت ل نەفسا خۆ نەی مقاتەبت ئەو دێ کەفتە بازارا خسارەتێ و دێ گونەهبار بت .
تُتاح هذه الصورة أيضا في: کوردی
