شێخ شامۆ دێ مینت ستێرەكا گەش د ئاسمانێ كوردستانێ و ئێزدیخانێ دا
حەیدەر عەرەبۆ یوسڤانی
شێخ شامۆ كەسایەتیەكێ كاریزما و ناڤدار و بەرناس و جڤاكی بوو لسەر ئاستێ كوردستانێ ب گشتی و ئێزدیخانێ ب تایبەتی،كەسایەتیەكێ نشتیمانپەروەر و خەمخۆر بوو بۆ كوردستانێ و ئێزدیخانێ،خودێ ژێ رازی شێخ شامۆ پەرلەمانتارێ بەرێ یێ پەرلەمانێ كوردستانێ و شێوەرمەندێ سەرۆك وەزیران بۆ كاروبارێن ئێزدیان و سەرۆكێ دەستا بلند بنگەهێ لالش یێ رەوشەنبیری و جڤاكی بوو،رەحمەتیێ شێخ رۆلەكێ مەزن د خۆرتكرنا پرۆسێسا پێكڤەژیانێ دا هەبوو،و كەسایەتیەكێ دیار و بەرچاڤێ گەلێ كوردستانێ ب گشتی و جڤاكا ئێزدیان ب تایبەتی بوو ، ژ دەستدانا وی د ڤێ قۆناغێ دا خوسارەتەكا ئێكجار مەزنە بۆ جڤاكێ مە،رۆل و خزمەتا خودێ‌َ ژێ رازی بۆ كوردایەتی و ئێزدیاتی چ جارا نائێتە ژبیركرن،رەحمەتیێ شێخ خەمخۆرێ مللەتەكێ بریندار بوو بەردەوام هەول ددا چارەكێ ژ وی مللەتی رە پەیدا بكت و بۆ ڤێ مەرەمێ د هەموو دەمێن خۆ دە دەریێن جیێن بەرپرس یێن نافخۆیی و نیڤ دەولەتی د قوتا،داكو بكاربت دەرمانەكی ژ دەردێن ڤی مللەتێ پەریشان رە پەیدا بكت،ب گشتی ژیانا خۆ تەرخانكربوو بۆ خزمەتێ نەمازە خزمەتا مللەتێ خۆ،ئەڤ چەندە د كاروانێ ژیان و خەباتا ویدە دیار و بەرچاڤ دبت .
شێخ شامۆ شیخۆ شێخ نەعمۆ ل سالا 1961 ل دەڤەرا دێرەبوونێ چاڤێ خۆ ل دنیایێ ڤەكرینە و ژیان ژێرە گرنژیە،رۆلەكێ مەزن هەبوو د ڕاپەرینا سالا 1991ێ دا و بۆ ماوێ هەفت سالا پێشمەرگەیاتی كریە،هە وەسا ل سالا 1993ێ دگەل كۆمەلەكا رەوشەنبیرێن ئێزدیان بنگەهێ لالش یێ رەوشەنبیری و جڤاكی دامەزراندن و ل كۆنگرێ دوازدێ و سێزدێ وەك سەرۆكێ بنگەهێ لالش هاتە هەلبژارتن، و ل سالا 2003ێ پشتی ئازادكرنا عێراقێ وەك راوێژكار د ئەنجوومەنا وەزیران هاتە دەست نیشانكرن ژبۆ كاروبارێن ئێزدیان و رۆلەكێ گرنگ بۆ بەرەڤانیكرنێ ل مللەتێ خۆ ل عێراقێ و هەرێما كوردستانێ هەبوو،هەر وەسا ل سالا 2014ێ ب رێژا 85% ژ دەنگێ ئێزدیان ل پارێزگەها دهۆك بوویە پەرلەمانتار ل پەرلەمانێ كوردستانێ دا،ب رزگاركەرێ بتر ژ 15 هەزار قوتابیێن زانكۆ و پەیمانگەهێن مووسل هاتە ناسكرن ب پشتەڤانیا حكومەتا هەرێما كوردستانێ ل سالا 2006ێ ژ مووسل ڤەگوهاستنە زانكۆ و پەیمانگەهێن هەرێما كوردستانێ ژبەر هێرشێن تیرۆرستان،رۆلەكێ هەر مەزن هەبوو د شەرێ دژی تیرۆرستێن داعش دا ل بەرەیێ شنگالێ ل سالا 2014ێ مل ب ملێ پێشمەرگەیێ قەهرمان دە و ل جینۆسایدا شنگالێ دا رۆلەكی كاریگەر د خزمەتا مللەتێ خۆ دا هەبوو،ل سالا 2017 ب بریارا سەرۆك بارزانی وەك ئەندامێ لژنا بلند یا ڕیفراندۆمێ هاتە هەلبژارتن،پشتی كابینا نەهێ یا حكومەتا كوردستانێ هاتیە پێكئینان شێخَ شامۆ وەك راوێژكارێ سەرۆك وەزیران بۆ كاروبارێن ئێزدیان هاتە دەست نیشانكرن.
ل رۆژا 27/12/2021ێ شێخ شامۆ تووشی نەخۆشیا كۆرۆنایێ بوو،پشتی ساخلەمیا وی تێكچوویی ل 3/1/2022 هاتە رەوانەكرن بۆ خەستەخانەكێ ل هەولێرێ پاشان ل 10/1/2022 هاتە رەوانەكرن بۆ ئەنقەرە و ل 18/1/2022 دلێ وی یێ مەزن و تژی دلۆڤانی ژ لێدانێ راوستا،كوردستانێ ب گشتی و ئێزدیخانێ ب تایبەتی كەسەكێ هێژا و لێزان و خودان هەلویست ژ دەستدا،و ل 20/1/2022 ب رێورەسمەكا تایبەت ل ڤرۆكخانا هەولێرێ یو ب ئامادەبوونا سەرۆكێ حكومەتا هەرێما كوردستانێ و كەسایەتیێن پلە بلند جەنازەیێ شیخ شامۆ هاتە پێشوازیكرن و پاشان ب گری و خەمگینی ڤە دناڤ هەزاران كەسان دا جەنازەیێ شێخ بەرەف داوی مەنزەلگەها وی برن ل خانكێ و ل گۆرستانا مەمێ شڤان دا هاتە ڤەشارتن،ژیان یا بەردەوامە هندەك كەس دەمێ دمرن چ ل پەیی نامینت و هندەك كەس بەس ناڤ دمینت و هندەكێ دیتر ژبیرا خەلكێ و دۆست و هەڤالا ناچن،چنكو خودان وژدان و رەوشتێن پاك و بەرهەمێن ساخلەمن،رەحمەتیێ شێخ شامۆ ئێك ژ وان كەسان بوو.
تُتاح هذه الصورة أيضا في: کوردی
