ئافرەت و پێكڤەژیان ل كوردستانێ
دلڤین خەلەف
پێكڤەژیان و برایەتیا پێكهاتەیان ل كوردستانێ،ئیرۆ بوویە جیێ شانازیا مللەتێ كورد ب گشتی و سەرەرای هەموو ئەوان ئاستەنگێن د درێژیا دیرۆكێ دا كەفتینە پێش هەبوونا وێ و دژواریا ئەوێ دوژمنایەتیا مێژووی یا كو وەلاتێن دەوروبەر ل دژی ئازادیا وێ بكاردئینا و نەدهێلان ب مافێ خۆ شادبن و بگەهنە ئارمانجێن خۆ یێن سەرەكی و لسەر ئاخا وەلاتێ خۆ بژین وەكو هەر وەلاتەكێ ئازاد.
هزر و بیرێن نڤیسینا ئەڤی بابەتێ گرنگ ل با من پەیدابوو دەمێ ئەم ب سەرەدانەكێ دگەل هژمارەكا ئەندامێن ئێكەتیا ئافرەتێن كوردستانێ ل پەرستگەها لالش ئامادەبووین ب مەرەما كو ژنێزیك ڤی جیێ پیرۆز ببینن،و پاشی ئەم هەموو ب هەڤرە ژ بۆ هەر كەسەكی بدەینە خویاكرن كو هەردەم كوردستان جیێ پێكڤەژیانێ بوویە و كا چاوان جیێ برایەتیا هەموو ئۆل و ئاین و نەتەوێن ئاشتی خوازبوویە و كا ب چی رەنگی ب هەڤرە دژین،بێگۆمان ئارمانج ژ ئامادەبوونا مە ل پەرستگەها لالش ئەو جیێ دیرۆكی یێ پاك و پیرۆز كو هەردەم ئێزدی رێورەسمێن خۆ یێن ئاینی لێ ساخ دكن و جەژن و ئاهەنگێن خۆ یێن جڤاكی ب ئازادی ل لالشێ دگێرن و هەردەم ژبۆ پاراستنا مرۆڤایەتیێ پەروەستەی خودایێ مەزن دبن، ئەوبوو ئەم راستیا پێكڤەژیانێ دناڤ كۆمەلگەها كوردی دە كو ئیرۆ هەی وەكو خۆ بدەینە دیاركرن و د ڤێ سەرەدانێ دە جڤاكێ ئێزدی بكەینە نموونا ئاشتیێ و لێك بۆرینێ ژبەركو ل درێژیا ژیانا خۆ دە ئاینێ مە تووشی ب سەدان هێرش و فرمانێن دژوار بوویە و هەردەم هەولێن قركرن و نەمانا وان ژلایێ دوژمنێن مرۆڤایەتیێ ڤە هاتیە دان، لێ هەموو جاران ئەوان ب باوەریەكا موكوم بەرگری ژ هەبوون و چاند و كەلتۆرێ باب و كالێن خۆ كریە و كارینە ئەڤی جیێ پیرۆز ژ هێرشێن دوژمنان بپارێزن هەتاكو ئیرۆ بوویە جهێ پێكڤەژیانا هەموو پێكهاتەیێن خێرخواز ل كوردستانێ و مللەتێ كورد ژی شانازیەكا مەزن پێ دبەت.
ئافرەتا كورد هەموو دەما داخوازا ژیانەكا بەختەوەر ژبۆ خێزانا خۆ كریە و ئازادی ژبۆ جڤاكێ خۆ خواستیە و قوربانیێن مەزن پێخەمەت ئەڤێ چەندێ داینە، لەوما ئیرۆ ئەڤان جۆرێن سەرەدانا دكەنە ئارمانج و هیڤیا پێكڤەژیانەكا ئارام و وەكهەڤیەكا دروست و دادپەروەرانە بۆ هەموو پێكهاتێن دەڤەرێ دخوازن داكو سەرجەم ئۆل و ئاین و نەتەوێن ل ناڤ كوردستانێ وەكو خوشك و برا ئەڤێ ئازادیێ بپارێزن و لسەر پێكڤەژیانەكا وەكهەڤی و براتیەكا موكوم دبەردەوام بن، ژبەركو ب تنێ بنەمایێن پێكڤەژیانێ و پاراستنا پێكهاتێن ل كوردستانێ گرێدایی یە ب ئارامیا دەڤەرێ ڤە و ئەڤ چەندە ژی لژێر سایا سیاسەتا دادپەروەرانە یا جەنابێ سەرۆك بارزانی و سەركردایەتیا پارتیا مە دئێتە جهـ و هیڤیێن هەموو پێكهاتێن ئەڤی وەلاتی ئیرۆ كوردستانەكا ئازاد و پێكڤەژیانەكا ئارامە.
ئیرۆ ل سەرانسەری دەڤەرا رۆژهەلاتا ناڤەراست كوردستان بوویە جیێ پیكڤەژیانا هەموو پێكهاتەیان،ژبەركو هەبوونا سەرجەم ئۆل و نەتەوا تێدا یە دیارە هەر وەكو كورد و عەرەب و توركمان و نەتەوێن جۆرا و جۆر و هەروەها ئاینێن موسلمان و مەسیحی و ئێزدی وشەبەك و كاكەیی و زەردەشتی ژی تێدە هەنە وهەر ئێك ژڤان ئۆل و ئاین ونەتەوا ب ئازادی و ب سەربەستی رێورەسم و ئاهەنگێن خۆ یێن تایبەت ب رێڤە دبەن و بێی كو هیچ كەس مایێ خۆ د كاروبارێن وان دە بكت،بەلكو بەروڤاژی ڤێ چەندێ د گێرانا رێورەسمان دە ب برایەتی پشكداریێ د ئاهەنگێن ئێكدا دكن و هەر ئەڤەیە رامانا پێكڤەژیانا راست و دروست دناڤ هەموو مللەتێن ئاشتیخواز دا،واتەیا پێكڤەژیانێ ئەڤەیە ل دەمێ ئیرۆ ئەم هەموو ل ئەڤی جیێ پیرۆز ل كوردستانەكا ئازاد گەهشتینە ئێك و رێزێ ل ئۆل و ئاینێن هەڤدوو بگرین و ب خۆشی و نەخۆشیان هەڤپشكێن ئێش و ئازارێن هەڤدوو بین.
ئەڤە پەیاما مەیە لسەر پێكڤەژیانێ ل ئەڤی جیێ پیرۆز و مەرەم ژ سەرەدانا مە ئەو بوو ئەم ژ نێزیك دگەل ئێك راستیا ژیارا هەموو پێكهاتەیێن مللەتێ خۆ و ب تایبەت جڤاكێ ئێزدی ل ڤی جیێ پیرۆز ببینین و دگەل ئێك گێرانا رێورەسمێن وان یێن ئۆلی و سەرەدەریا وان دگەل ئۆل و نەتەوێن دن ببینین و پشكداریێ و دانوستاندنێ لسەر خالێن گرنگ و ئەرێنی یێن پێكڤەژیانا وان دگەل خەلكێ دن دا بكەین و راستیێن هاتینە دیتن وەكو خۆ ژبۆ هەر كەسی ڤەگوهێزین،ژبەركو ئەم وەكو مللەتێ كورد هەموو ل خالا داویێ و لسەر بنەمایەكێ نەتەوەی ب هەڤرە دگەهین و پێكهاتێن ئێك وەلاتینە و ژیانا مە هەموویا د ڤێ پارچا ئازاد دە ب هەڤرە گرێدایە و چارەنڤیسێ مە هەموویا ئێكە و سەرەدانا مە بۆ لالشا نوورانی جیێ باب و كالێن مە كوردان ئێك ژ بنەمایێن پێكڤەژیانا وەلاتێ مە یێ رەنگینە.
تُتاح هذه الصورة أيضا في: کوردی
