تۆرا لالش
ب ئامادەبوونا هژمارەکا مەزن ژ بەرپرس و نوینەرێن دام و دەزگەهێن میری و نوێنه‌رێن یه‌كه‌یێن ئیدارى یێن قه‌زایێن سێمێل و ناحیێن فه‌یدێ و پارێزگه‌ها دهوك و نوینه‌رێن رێكخراوێن نێڤده‌وله‌تى و ناڤخۆیی، كه‌ساتى و ریهسپى و ره‌وشه‌نبیر و مامۆستایێن ده‌ڤه‌رێ ژ خۆجهێن شاریا و ئاواره‌یێن شنگالێ و گه‌نج و كچ و ژنێن ئێزدى و رزگاربوویێن ده‌ستێ داعش و مفادارێن رێكخراوێن پشكدار ب هه‌موو ته‌مه‌ن و هه‌ردوو ره‌گه‌زانڤه .
ل رێکەفتی 27/4/2025 رۆژا ئێکشەمبوویێ ل یاریگەها JRS ڤیسته‌ڤالا شاریا یا كه‌لتوور و پێكڤه‌ژیانێ ل شاریا لسه‌ر ئاسته‌كى جه‌ماوه‌رییێ مه‌زن و رێكخستى ژ لایێ بنگه‌هێ لالش تایێ شاریا و رێکخراوا JRS و ب پشتەڤانیا دەستەیا بلندا بنگەهێ لالش يێ رەوشنبيری و كومەلایەتی و بەشداریا هژمارەکا رێکخراوێن کۆمەلگەها شاریا ( بهاراهیڤیا،بنگەهێ لالش باعەدرێ،پەناگە، مالا بشیر کوريە و SP ) و باخچێ شاریا یێ زاۆکان و گرۆپێ موزیکێ یی ئەزدا، ل سنوورێ كۆمه‌لگه‌ها شاریا ل ژێر درۆشمێ کەلتور ناسنامە گەلانە ڤیسته‌ڤال هاتە سازکرن .
د ڤێ ڤیستەڤالێ دا چه‌ندین پێشانگه‌هـ و برگێن جودا یێن گرێداى ب كه‌لتۆر و چاند و پێكڤه‌ژیانا ئێزدیان دانە به‌رچاڤكرن، ئه‌وێن ب درێژیا دیرۆكێ ب رێیا باب و كالان و نفشێن ل دووڤ ئێك بۆمه ماین و هاتینه پاراستن، ئه‌ڤ ڤیسته‌ڤاله بزاڤه‌كه بۆ بتر خورتكرنا گیانێ لێبۆرینێ و پێكڤه‌ژیان و براتیێ دناڤبه‌را جڤاكا ئێزدى ب تایبه‌ت و جڤاكا كوردى ب گشتى دا ، و شیان و به‌هره‌یێن زارۆك و گه‌نج و ئافره‌تا ئێزدى دده‌ته دیاركرن بۆ درێژه‌پێدانا كه‌لتۆرێ پێكڤه‌ژیانێ و هیڤییه‌كێ دده‌ته نفشێن داهاتى بۆ مانا ئه‌وى كه‌لتۆرى.
ئارمانج ژ ڤی ڤیسته‌ڤالێ ساخكرنا كه‌لتۆرێ جڤاكا ئێزدى و دیاركرنا جوانى و كه‌ڤناریا كه‌لتۆرێ ئێزدى بوو برێكا نمایشكرنا وێنه‌یێن فۆتۆگرافی و فلكلۆرى، جلوبه‌رگ، خوارن، ئالاڤێن جوتیاریێ و خوارنێ، یاریێن كه‌ڤن. ديسان خورتكرنا گیانێ لێبۆرینێ دناڤا جڤاكى دا ب هه‌موو ته‌خ و چینێن وێڤه و گرێدانا نفشێن نوو و داهاتى ب كه‌لتور و دیرۆكا باب و كالانڤه. و دیاركرنا رۆلێ ئافره‌تا ئێزدى درێڤه‌برنا خێزانێ دا و هاریكاریا وێ دپاراستنا كه‌لتۆرێ جڤاكا ئێزدى دا، خورتكرنا په‌یوه‌ندیان دناڤبه‌را رێكخراوێن ل ده‌ڤه‌رێ كار دكه‌ن بۆ بتر خزمه‌تكرنێ و هه‌ماهنگیێ و هەر دیسان به‌رچاڤكرنا كار و خزمه‌تێن رێكخراوێن جڤاكا مه‌ده‌نى ل شاریا پێشكێشى ئاواره و خۆجهێن ده‌ڤه‌رێ دكه‌ن.
تُتاح هذه الصورة أيضا في: کوردی
