تۆرا لالش
دەقێ پەیاما سەرۆك بارزانی:
بناڤێ خودێ مەزن و دلۆڤان
ب هەلكەڤتا 34ەمین سالییا سه‌رهلدانا مەزن یا گەلێ كوردستانێ، پیرۆزباهییان ل خێزانێن سەربلندێن شەهیدان و پێشمەرگێن قەهرەمان و هەموو خەباتكەر و ئازادیخواز و نشتیمانپەروەر و تەڤایا خەلكێ كوردستانێ دكەم.
سه‌رهلدان ئێكە ژ سەروەری و دەستکەڤتێن گرانبەها یێن گەلێ کوردستانێ و د سایا ئیرادا ئازادیخواز یا گەلێ كوردستانێ و قارەمانییا پێشمەرگەی و ئێكڕێزییا لایەنێن ناڤ بزاڤا ڕزگاریخوازا كوردستانێدا هاتەدی و سەركەڤتن ب دەستڤەئینا. سه‌رهلدان ل دژی دامودەزگەهێن ستەمکار و داگیرکەر، پەیامەكا ڕوون بوو کو سەرەڕای بوونا زۆلم و ژناڤبرنێ، گەلێ كوردستانێ یێ زیندییە و ئازادی و سەربەستی دڤێت، سه‌رهلدانێ ئەو ڕاستییە سەلماند كو داگیركاری و ستەم چەند ب هێز ژی بن، دێ هەر ب دووماهی هێن، ئەڤە ئیرادە و هێزا گەلێ كوردستانێیە كو دێ ب سەركەڤیت.
د ڤێ بیرەوەرییا پیرۆزدا، دووپاتییێ ل بهایێن پیرۆز یێن سه‌رهلدانێ و پەیاما ئاشتی و برایەتی و پێكڤەژیانا گەلێ كوردستانێ دكەین. سلاڤان بۆ ڕۆحا بلند یا شەهیدێن سه‌رهلدانێ و هەموو شەهیدێن خەباتا ڕزگاریخوازا كوردستانێ دهنێرین، کو ب خوینا خۆ ئازادی و سەربەستی بۆ گەلێ مە ب دەستڤەئینا.
تُتاح هذه الصورة أيضا في: کوردی
