بڕیار بۆ ڤەگوهاستنا راژەیا فەرمانبەران دەرچوو
باسنيوز:
جڤاتا وەزیران رەزامەندی لسەر ڤەگوهاستنا راژەیا فەرمانبەران بۆ فەرمانگەهەکا سه‌ر ب وەزارەتا كار و كاروبارێن جڤاکی دەرخست و د ڤەگوهاستن ژی بۆ هەمی پارێزگەهـ و ئیدارێن سەربەخۆ هەبیت.
جڤاتا وەزیرێن كوردستانێ، ب نڤیسارەکێ رەزامەندی لسه‌ر ڤەگوهاستنا راژەیا فەرمانبەران بۆ سەر میلاكێ وەزارەتا كار و كاروبارێن جڤاکی دایە.
ل دیف نڤیسارێ، كو كۆپییەك دەست (باسنیوز) كەفتیە، جڤاتا وەزیران داخاز ژ فەرمانگەهـ و وەزارەتان كریە کۆ “هەر فەرمانبەرەک، ژ هەر سازیەکا حكوومەتێ، ژبلی راژەیا سەربازی، ئارەزوویا ڤەگوهاستنا راژەی بۆ رێڤەبەرایەتیێن دەستەبەرییا جڤاکی بۆ کرێکاران هەبیت دێ ڤەگوهاستن ل پارێزگەهـ و ئیدارێن سەربەخۆ، بۆ هێتە کرن.”
ئاماژە ب وێ ژی كر، هەر فەرمانبەرەکێ بڤێت ڤەگوهاستنا راژەی بۆ بهێتە کرن، وەزارەت دشێن جڤاتا وەزیران ئاگەهدار بكەن، هەتا كارێ پێتڤیێ ڤەگوهاستنا راژەی بۆ بهێتە کرن بۆ سەر میلاكێ وەزارەتا كار و كاروبارێن جڤاکی.
ل دیف نڤیسارەکێ وەزارەتا کار و کاروبارێن جڤاکی یا حکوومەتا هەرێما کوردستانێ، کو کۆپییەک دەست (باسنیوز) کەفتیە و بۆ جڤاتا وەزیران هنارتیە، د نڤیسارێدا هاتیە: “ب مەرەما كارهێسانیا زێدەتر بۆ كرێكاران و خودانكار و بلەز دەربازکرنا مامەلەیێن ولاتییان، ل سنوورێ رێڤەبەرایەتییا دەستەبەرا جڤاکی بۆ كرێكاران ل پارێزگەهێن هەولێر و دهۆك و سلێمانی و ئیدارێن گەرمیان و سۆران و راپەڕین و زاخۆ، مە پێتڤی ب فەرمانبەران هەیە ژ پسپۆریێن جوداجودا.”
بەرێ کوێستان محەمەد، وەزیرا کار و کاروبارێن جڤاکی بۆ (باسنیوز) راگەهاند: “ژبەر کێمیا میلاکێ فەرمانبەران ل وەزارتا مە، ل هندەک رێڤەبەرایەتی و فەرمانگەهێن سەر ب وەزارەتا کار و کاروبارێن جڤاکی مە پێتڤی ب فەرمانبەران هەیە و جڤاتا وەزیران ژی رەزامەندی دایە کۆ فەرمانبەران ژ وەزارەتێن دی ڤەگوهێزن، بەلێ مە ئاریشا کێمیا میلاکی هەیە.”
ژبەر خانەنشینبوون و دەستێری و نەبوونا دامەزراندنێ، ئاریشا کێمیا فەرمانبەران ل هندەک فەرمانگەهان دروست بوویە، جڤاتا وەزیران، ل دیف داخازی و پێتڤیێن وەزارەتێ و فەرمانگەهان، د هندەک حاڵەتاندا ڤەگوهاستنا ڕاژەی ڤەکریە.
تُتاح هذه الصورة أيضا في: کوردی
