ده‌سته‌يا ناوچێن کوردستانی يێن دەرڤەی ئیدارا هەرێمێ: هیڤيخوازین ئەنجامێن هه‌ڵبژارتنان داويێ ب داگیرکاريێ بينن
K24 – هەولێر:
بەبۆنەی كۆتاییهاتنی هەڵبژاردنی ئه‌نجوومه‌نی پارێزگاكان و بەشداریی کاریگەری دانیشتوان و کوردانی ناوچە کوردستانییەکان، دەستەی گشتی ناوچە کوردستانییەکانی دەرەوەی ئیدارەی هەرێم راگه‌یه‌ندراوێكی بڵاوكرده‌وه.
له راگه‌یه‌ندراوه‌كه‌دا هاتووه: جارێکی دیكه ئه‌نجامه‌كان کوردستانیی بوونی ناوچە کوردستانییەکانی دەرەوەی ئیدارەی هەرێمی کرد بە راستی و هیچ دەرفەتێکی لە بەردەم عەقڵە شۆڤێنییه‌كان نەهێشتووه‌ته‌وه.
هه‌روه‌ها له په‌یامه‌كه‌دا ئه‌وه‌ش خراوه‌ته‌ڕوو، هیوادارین سەرکردایەتی سیاسی کوردستان بە دیدی هاوبەش و کاری پێکەوەیی، خەبات لە پێناو پێکهێنانی حکومەتی خۆجێیی لە تەوای ناوچەکان و بە یەکگرتوویی و خیتابێکی کوردستانی بکەن.
لە 15 پارێزگای عێراق بە کەرکووک و ناوچەکانی دەرەوەی ئیدارەی هەرێمی کوردستانەوە، 16 ملیۆن کەس کارتی دەنگدانیان وەرگرتەوە و مافی دەنگدانیان هەبوو، بەڵام تەنها 6 ملیۆن کەس بەشداری پرۆسەی هەڵبژاردنی کرد، لەگەڵ ئەوەی 23 ملیۆن کەس مافی دەنگدانی هەبوو، بەپێی راگەیاندنی کۆمیسیۆنیش، رێژەی بەشداری 41٪ بووە لە هەڵبژاردنی ئەنجوومەنی پارێزگاکانی عێراق کە رۆژی( 18-ی کانوونی یەکەمی 2023) لە سەرتاسەری عێراق( جگەلە هەرێمی کوردستان) بەرێوەچوو.
ئەمڕۆ سێشەممە ( 19-ی کانوونی یەکەمی 2023)، کۆمیسیۆنی باڵای سەربەخۆی هەڵبژاردنی عێراق، ئەنجامی بەراییەکانی هەڵبژاردنی ئەنجوومەنی پارێزگاکانی عێراقی لە کۆنگرەیەکی رۆژنامەنووسیدا بڵاوکردەوە.
ده‌قی راگەیەنراوی دەستەی گشتی ناوچە کوردستانییەکانی دەرەوەی ئیدارەی هەرێم:
بەبۆنەی سەرکەوتنی هەڵبژاردن و بەشداریی کاریگەری دانیشتوان و کوردانی ناوچە کوردستانییەکان و بەدەستهێنانی ڕێژەیەکی باشی دەنگ و کورسی لە ئەنجوومەنی پارێزگاکانی عێراق، پیرۆزبایی گەرمتان لێ دەکەین، ئەم ئەنجامانە کوردستانیی بوونی ناوچەکان جارێکی تر کرد بە ڕاستی و هیچ دەرفەتێکی لە بەردەم ئەو جۆرە بیرکردنەوە و عەقڵە شۆڤێنییانە نەهێشتەوە کە هەمیشە بەپلان و ئەجندای جیاوازەوە لە هەوڵی تێکدانی ناسنامەی کوردستانیی بوونی ئەو ناوچانەدابوون، ئێمە لە دوای دەرئەنجامەکانی هەڵبژاردن بە ئومێدێکی زۆرەوە چاوەڕوانی داهاتووی باشترین بۆ ناوچە کوردستانییەکانی دەرەوەی ئیدارەی هەرێم دەکەین و هیوادارین سەرکردایەتی سیاسی کوردستانیش بە دیدی هاوبەش و کاری پێکەوەیی خەبات بکەن لە پێناو پێکهێنانی حکومەتی خۆ جێیی لە تەوای ناوچەکان و بەیەکگرتوویی و خیتابێکی کوردستانی، هەروەها هەنگاوەکانی داهاتوویان بینا بکەن، هیواخوازین ئەم ئەنجامانە کۆتایی بە تەعریبی نوێ و داگیرکاری ناڕەوا بهێنێت و جارێکی تر پیرۆزبایی گەرمتان لێدەکەین و ناسنامەی کوردستانیی بوونی خۆتان لە وەهمی داگیرکەرانەوە گۆڕی بۆ ڕاستی مێژوویی و نەخشەی کوردستانتان بە ئامانەتەوە بردەوە چیای حەمرین.
دەستەی گشتی ناوچە کوردستانییەکانی دەرەوەی ئیدارەی هەرێم
19 – 12 – 2023
تُتاح هذه الصورة أيضا في: کوردی
