سه‌رۆك نێچیرڤان بارزانى ل گه‌ل شانده‌كێ بلند یێ هه‌ڤپه‌یمانیا نێڤده‌وله‌تى كۆمبوو
گاڤ
سه‌رۆكێ هه‌رێما كوردستانێ ل گه‌ل شانده‌كێ بلند یێ هه‌ڤپه‌یمانیا نێڤده‌وله‌تى كۆمبوو و تێدا چاكسازیێن د وه‌زاره‌تا پێشمه‌رگه‌ى دا و ژماره‌یه‌كا ته‌وه‌رێن دى هاتنه به‌حسكرن.
نێچیرڤان بارزانى سه‌رۆكێ هه‌رێمێ و فه‌رمانده‌یێ گشتى یێ هێزێن پێشمه‌رگه‌ى ل ئێڤاریا ئه‌ڤرۆ ئێكشه‌مبیێ پێشوازى ل شانده‌كێ بلند یێ هێزێن هه‌ڤپه‌یمانان كر كو ژ جه‌نه‌رال ماتیۆ ماكفارلان فه‌رمانده‌یێ به‌رێ یێ هێزێن هه‌ڤپه‌یمانان ل ئیراقێ و سووریا و جه‌نه‌رال جوول ڤاول فه‌رمانده‌یێ نوى یێ هێزێن هه‌ڤپه‌یمانان ل ئیراقێ و سووریا و كۆنسۆلێ گشتى یێ نوى یێ ئه‌مریكا ل هه‌رێما كوردستانێ و ژماره‌یه‌كا به‌رپرسێن سه‌ربازى و دپلۆماسى پێكهاتبوو.
سه‌رۆكاتیا هه‌رێمێ به‌لاڤكریه؛ د دیداره‌كێ دا، سه‌رۆك نێچیرڤان بارزانى سوپاسیێن هه‌رێما كوردستانێ گه‌هاندنه جه‌نه‌رال ماكفارلان فه‌رمانده‌یێ به‌رێ یێ هێزێن هه‌ڤپه‌یمانان ل ئیراقێ و سووریا ژ به‌ر رۆل و پشته‌ڤانیا وان بۆ ئیراقێ و هه‌رێما كوردستانێ بۆ به‌رهنگاریا تیرۆرێ و تێكشكاندنا داعش.
“سه‌رۆكێ هه‌رێمێ هیڤیا سه‌ركه‌فتنێ بۆ ماكفارلان د ئه‌ركێ وى یێ نوى دا خواست و بخێرهاتنا جه‌نه‌رال ڤاول فه‌رمانده‌یێ نوى یێ هێزێن هه‌ڤپه‌یمانان ل ئیراقێ و سووریا كر هه‌روه‌سا به‌رهه‌ڤیا هه‌رێما كوردستانێ بۆ به‌رده‌وامیا هاریكاریا هه‌ڤپشك و سه‌رخستنا ئه‌ركێ هه‌ڤپه‌یمانیا نێڤده‌وله‌تى بۆ ژناڤبرنا ب ئێكجارى یا داعش ده‌ربڕى”، ل گۆره‌ى به‌یانا سه‌رۆكاتیێ.
به‌یانێ دیار ژى كریه “د دیداره‌كێ دا، دویماهیك پێشهات و گاڤێن پرۆسێسا چاكسازیێ د وه‌زاره‌تا پێشمه‌رگه‌ى دا و ئێكخستنا پێشمه‌رگه‌ى هاتنه به‌حسكرن و هه‌ردو لایان نیگه‌رانیا خۆ ل دۆر گرفت و ئاسته‌نگێن د رێكا ڤێ چه‌ندێ دا ده‌ربڕین”.
“د ته‌وه‌ره‌كێ دى یێ كۆمبوونێ دا، دویماهیك پێشهاتێن شه‌ڕێ دژى تیرۆرێ و مه‌ترسیا داعش ل ئیراقێ و سووریا و ئه‌ركێ هه‌ڤپه‌یمانیا نێڤده‌وله‌تى هاتنه به‌حسكرن و هه‌ردو لایه‌ن د هه‌ڤڕا بوون كو هێشتا داعش مه‌ترسیه و ئیراقێ و هه‌رێمێ پێدڤى ب به‌رده‌وامیا پشته‌ڤانیا هه‌ڤپه‌یمانان هه‌یه”، به‌یانێ زێده كریه.
به‌حسكرنا ره‌وشا ئیراقێ و هه‌رێما كوردستانێ و ده‌ڤه‌رێ ب گشتى ژ ته‌وه‌رێن دى یێن كۆمبوونێ بوون.
تُتاح هذه الصورة أيضا في: کوردی
