كۆمیته‌یا ناڤه‌ندى: پارتى د كۆمبوونان دا گه‌ل لایه‌نێن سیاسى بۆ چاره‌كرنا كێشه‌یان دێ به‌رده‌وام بیت
گاڤ
كۆمیته‌یا ناڤه‌ندى یا پارتى ب سه‌رپه‌رشتیا سه‌رۆك بارزانى كۆمبوو و راگه‌هاند كو پارتى د كۆمبوونان دا گه‌ل لایه‌نێن سیاسى بۆ چاره‌كرنا كێشه‌یان و ئاسته‌نگان دێ به‌رده‌وام بیت.
ل گۆره‌ى راگه‌هاندنه‌كا كۆمیته‌یا ناڤه‌ندى؛ كۆمیته‌یا ناڤه‌ندى ئه‌ڤرۆ چارشه‌مبیێ ب سه‌رپه‌رشتیا سه‌رۆك بارزانى و ب به‌رهه‌ڤبوونا سه‌رۆك نێچیرڤان بارزانى جێگرێ سه‌رۆكێ پارتى، ل گه‌ل ئه‌ندامێن كۆمیته‌یێ، ئه‌ندامێن یه‌ده‌ك و به‌رپرسێن لقێن پارتى كۆمبوونا خۆ یا به‌رفره‌هـ ئه‌نجامدا.
د راگه‌هاندنێ دا هاتیه ژى؛ پشتى دانوستاندن و لێكگوهارتنا بۆچوونان ل سه‌ر بابه‌تێن هه‌نوكه‌یى و گرنگ یێن جیهانێ و ده‌ڤه‌رێ ب گشتى و ئیراقێ و كوردستانێ ب تایبه‌تى، ئه‌ڤ ته‌وه‌رێن ل خوارێ هاتنه گه‌نگه‌شه‌كرن و بڕیار بۆ بابه‌تێن پێدڤى هاتنه دان:
1. ته‌وه‌رێ ئێكێ، ره‌وشا گشتى یا نێڤده‌وله‌تى: رویدانێن جیهانێ و كارتێكرنا وان ل سه‌ر هه‌رێما كوردستانێ.
2. ته‌وه‌رێ دوێ، ره‌وشا هه‌رێمایه‌تى: په‌یوه‌ندیێن هه‌رێمێ ل گه‌ل وه‌لاتێن جیران هاتنه به‌حسكرن و تێدا دوپاتى ل سه‌ر رێزگرتنێ ل سه‌روه‌ریا وه‌لاتان هاته كرن ل گه‌ل به‌رچاڤوه‌رگرتنا به‌رژه‌وه‌ندیێن هه‌رێمێ ل گه‌ل وان وه‌لاتان.
3. ته‌وه‌رێ سیێ، ره‌وشا ئیراقێ: بابه‌تێ رێككه‌فتنا هه‌ڤپه‌یمانیا برێڤه‌برنا ده‌وله‌تێ هاته به‌حسكرن و ب تایبه‌ت ئه‌و مادده‌یێن نه‌هاتینه بجهئینان.
4. ته‌وه‌رێ چارێ، پشته‌ڤانى ل حكومه‌تا هه‌رێمێ: د كۆمبوونێ دا پشته‌ڤانى بۆ حكومه‌تا هه‌رێما كوردستانێ هاته دوپاتكرن ل گه‌ل به‌حسكرنا چاره‌كرنا كێشه‌یان ل گه‌ل حكومه‌تا فیدرالى و بابه‌تێ بودجه‌یێ.
5. ته‌وه‌رێ پێنجێ، ره‌وشا ناڤخۆیى ل هه‌رێمێ: بابه‌تێ هه‌لبژارتنێن په‌رله‌مانێ كوردستانێ و هه‌لویستێ پارتى و گاڤێن تا نوكه هاتینه هاڤێتن، هاتنه به‌حسكرن، كۆمبوونێ دوپاتكر “پارتى د كۆمبوونان دا گه‌ل لایه‌نێن سیاسى بۆ چاره‌كرنا كێشه‌یان و ئاسته‌نگان دێ به‌رده‌وام بیت”.
6. ته‌وه‌رێ شه‌شێ، ره‌وشا ناڤخۆ یا پارتى: به‌حس ل شێوازێ كارێ ئۆرگانێن پارتى و كارێ به‌رپرس و كادرێن پارتى د ڤێ قووناغێ دا هاته كرن.
تُتاح هذه الصورة أيضا في: کوردی
