پەرلەمانتارەكێ پارتی ل جڤاتا نوونەرێن عێراقێ:شاندەكێ ئێزدیان و حكومەتا هەرێما كوردستانێ دێ كەیسا جینۆسایدا ئێزدیان گەهیننە فەرەنسا
ئهڤرۆ نيوز:
پەرلەمانتارەكێ پارتی ل جڤاتا نوونەرێن ئێراقێ دگەل شاندەكێ ئێزدیان و حوكمەتا هەرێما كوردستانێ دێ كەیسا جینوسایدا ئێزدیان گەهیننە فەرەنسا و ل دووڤ دا كەیسا جینوسایدا ئێزدیان بۆ دادگەها لاهای دهێتە رادەستكرن.
خالد سەلیم، پارلەمانتارێ پارتی ل جڤاتا نوونەرێن ئێراقی راگەهاند، بەرهەڤیێ یێ دهێنە كرن بۆ كاركرنێ ل سەر كەیسا جینوسایدا شنگالێ، لێ هەتا نوكە پەرلەمانێ عێراقێ دانپێدان ب كەیسا جینوسایدا ئێزدیان ل شنگالێ نەكریە، ئەم هەولددەین ئیراق دانپێدانی بكەت و ل نێزیك دێ شاندەكێ مەزن یێ پێكهاتی ژ نوونەرێن ئێزدیان و ئەندام پەرلەمان و نوونەرێن حوكمەتێ سەرەدانا فەرەنسا كەن بۆ دانە ناسینا جینوسایدا شنگال».
ئاشكرا كر، دەست ب رێكارێن جینوسایدا شنگالێ دهێتە كرن و دێ بۆ دادگەها لاهای و فەرەنسا هێتە رەوانەكرن، هەتا نوكە پتر ژ پێنچ هزار بەلگەنامەیان هاتنە كۆمكرن ژئالیێ لایەنێن پەیوەندیدار ڤە ل هەرێما كوردستانێ و ل نیزیك دێ كەیسا جینوسایدا شنگالێ دەینە فەرەنسا و دادگەها لاهای، گەلەك دەولەتان دانپێدان ب كەیسا جینوسایدا شنگالێ كریە و دێ دگەل دادگەها لاهای كار كەین دانپێدان ب كەیسا جینوساێدا ئێزدیان بهێتە كرن».
ل دووڤ ئامارێن نڤێسینگەها رزگاركرنا رەڤاندیێن ئێزدی، ل سالا 2014ی ژ ئەگەرێ هێرشا هوڤانە یا تیرۆرستێن داعش بۆ سەر شنگالێ، پتر ژ شەش هزار و 417 كەسێن ئێزدی ژ هەردوو رەگەزان هاتنە دەستەسەركرن و رەڤاندن و بێ سەروشینكرن، هەتا نوكە ژی پتر ژ سێ هزار و500 كەسان ژ هەردوو رەگەزان رزگاربووینە و هێشتا چارەنڤیسێ پتر ژ دوو هزار كەسان دیار نینە و هەتا پینچ هزار كەسێن ئێزدی شەهید بووینە و دوو هزار و 745 كەس بووینە ئێتیم».
ل دووڤ ئامارێن دەستەیا ڤەكۆلین و كۆمكرنا بەلگەنامەیان ل دهۆكێ پینچ هزار و170 كەیس ل سەر جینۆسایدا شنگالێ یێن هاتینە تۆماركرن، ژ وانا ژی دوو هزار و 778 كەیس هاتینە تەمامكرن و 119 گۆرێن بكۆم و تاكە كەسی ل شنگالێ یێن هاتنە دیتن، ژ وانا ژی 42 گۆرێن بكۆم یێن هاتینە ڤەكرن و 25 گۆرێن تاكەكەسی یێن هاتینە ڤەكرن و 370 رۆفات ژناڤ گۆرێن بكۆم و تاكە كەسی هاتینە دەرئێخستن و هەتا نوكە ناسنامەیێن 170 رۆفاتان ئاشكرابووینە و هێشتا ناسنامەیێن پتر ژ 200 رۆفاتان ئاشكرانەبووینە».
تُتاح هذه الصورة أيضا في: کوردی
