“پەكەكە بوویە رێگر ل هەمبەر ئاڤەدانكرن و ڤەگەریانا خەلكێ و ئاسایشێ بۆ دەڤەرا شنگالێ”
دەنگێ لالش،كاروان باعەدری
مامۆستایێن زانكۆیێ و سەرۆكێن پارتێن كوردی ئاشكەرا دكن كو پەكەكە هاریكاریێ ژ بەغدا وەردگرت و ناهێلت ئالایێ كوردستانێ ل شنگالێ بێتە بلندكرن،ئەوا ل قەزایێ دكت شەرفرۆشیە و هەبوونا وێ هێزەكا نەشەرعیە و بزاڤان دكت ئەجیندایێن هەرێمایەتی و دەرەكی لێ بجهبینت و دڤێت كانتۆنا چێكت و ژ هەرێمێ جودا بكت،هەروەسا بوویە رێگر ل هەمبەر ئاڤەدانكرن و ڤەگەریانا خەلكێ و ئاسایشێ بۆ دەڤەرێ و یا فەر و پێتڤیە شنگالێ چوول بكت و جهێ خەباتا وێ نینە و ماف نینە دەست بێختە ناڤ كاروباران دا و ئەڤە نائێتە قەبوولكرن،دووپات دكن ژی كو دڤێت شنگال ب فەرمی بكەفتە سەر هەرێما كوردستانێ.
شارەزا دپەیوەندیێن نێڤ دەولەتی دا د.(نەوزاد هێتوتی) گۆت:شنگال و رەبیعە دەڤەرێن ستراتیژی نە ژ ئالیێ سەربازی و سیاسی ڤە و بەشەكێ نەڤە قەتیایی نە و هەموو دەزگەهێن شەرعی سەر ب هەرێما كوردستانێ ڤەنە،پێتڤیە جارەكا دی ئەڤ دەزگەهە كارێ خۆ ب كەنەڤە و كوردستان قۆناغەكا ستراتیژیە بۆ شنگالێ،پەكەكە بزاڤان دكت ئەجیندایێن هەرێمایەتی و دەرەكی بجهبینن و دڤێت كانتۆنا چێكت ژ هەرێمێ جودا بكت و ناهێلت ئالایێ كوردستانێ بێتە بلندكرن و هاریكاریێ ژ بەغدایێ وەردگرت.
هەروەسا جێگرێ سەرۆكێ گشتی یێ پارتا سۆسالیستا كوردستانێ ل توركیا(بایران بۆزیەل)دیاركر،پێتڤیە پرسا شنگالێ ب رێیێن دیالۆگ و ئاشتیێ بێنە چارەكرن، ئەڤە چ ئاستەنگی پێ نەڤێن بەلێ پێنگاڤ دڤێن، جێگیربوونا پەكەكێ ل شنگالێ بێ دەستوریا هەرێمێ یە، راستە ل دەمێ كارەساتا شنگالێ پەكەكێ هاریكاری كریە و مالا وان ئاڤابت،چنكو ئەو پێشمەرگەیێن قارەمان شنگال رزگاركر و حكومەتا هەرێمێ هەموو بزاڤان دكت برینێن ئێزدیان دەرمان بكت لێ پەكەكە یا بوویە رێگر ل هەمبەر ئاڤەدانكرن و ڤەگەریانا خەلكێ و ئاسایشێ بۆ دەڤەرێ و یا فەر و پێتڤیە پەكەكە شنگالێ چوول بكت و ڤەگەرتە جهێ خەباتا خۆ یا راست و دروست،چنكو پێتڤیە ئەو رێزێ ل سەروەریا و حكومەتا هەرێمێ بگرت و چ كێشەیان بۆ دروست نەكت و هندی ل شنگالێ بمینت دێ بتە رێكخۆشكەر بۆ وەلاتا بۆ دەستێوەردانێ دناڤ ئاخا شنگالێ دا.
دیسان بەرپرسێ لقێ هژدە یێ پارتی دیموكراتی كوردستان ل ئامێدیێ (عومەر ئۆرەیی)خویاكر،ئەوا پەكەكە ل شنگالێ دكت شەرفرۆشیە و هەبوونا وێ هێزەكا نەشەرعیە،ئەڤا ئەو دكت شاشیە و هیڤیدارین ژ شاشیێن خۆ لێڤەبت،ب مەنتیقی عەقلی كاربكت.
ژبال خۆڤە سەرۆكێ گشتی یێ پارتیا ئازادیا كوردستانێ(موستەفا ئۆزجەلیك)راگەهاند،شنگال د هشمەندیا هەر كوردەك و كوردستانی دا برینەك كورە، دوژمن و خێرنەخوازێن مللەتێ كورد رێخۆشكەرن كو داعش ب سەر شنگالێ دا بگرت و جینۆسایدەك ل سەر خووشك و برایێن مە یێن كوردێن ئێزدی پێكئینا، ب راستی كۆمەلكوژیا شنگالێ پلانەكا ستراتیژی بوو ل دژی گەلێ كوردستانێ و شنگال ب ژ دەستێ پێشمەرگەی هاتە رزگاركرن و دڤێت ب فەرمی بكەفتە سەر هەرێمێ و كوردستان ب بەرنامەیێن تایبەت برینا ئێزدیان و هەموو كوردستانیا سارێژ بكت،دیسان دڤێت ل گۆری تایبەتمەندیا شنگالێ و ئێزدیان نەخشە رێیەك بێتە دانان،ئیرۆ پەكەكە ل شنگالێ بوویە جهێ سەرگێژیێ و ئاستەنگ ل هەمبەر سەربەخۆیا باشوورێ كوردستانێ و پێتڤیە رێزێ ل پەرلەمان و حكومەتا هەرێما كوردستانێ بگرت وژ شنگالێ خۆ ڤەكێشت،ژبەركو بۆ هاریكاریا كوردێن ئێزدی چووبوونە قەزایێ لێ نۆكە چ مەترسی نەمایە و پێشمەرگەیێن كوردستانێ لێ دئامادەنە و حكومەتا كوردستانێ سوپاسیا پەكەكێ كربوو و دڤێت بێتە ڤەكێشان،چنكو هەر بۆستەكا ئاخا هەرێمێ ب خوونا پێشمەرگەیی هاتیە رزگاركرن و هندەك لایەنا دڤێت شنگال و كەركووكێ ب بەغدایێ ڤە گرێدەن.
ژلایەكێ دی ڤە سەرۆكێ گشتی یێ پارتی دیموكراتی كوردستان- باكوور(سارتاج بوجاك) دیاركر،پەكەكێ دڤێت خۆ د شنگالێ دا بهێلت و رێگر بت بەرامبەر ئاڤەدانكرنا وێ،شنگال جهێ خەباتا پەكەكێ نینە و ماف نینە دەست بێختە ناڤ كاروباران دا و ئەڤە نائێتە قەبوولكرن،ژبەركو شنگال بەشەكی ژ هەرێما كوردستانێ یە و كوردێن ئێزدی ئازارەكا مەزن یا دیتی و پێشمەرگەیان ژبۆ رزگاركرنا وان قوربانیێن زۆر یێن داین، پێَتڤیە رێز ل سەروەریا هەرێمێ بێتە گرتن، یە دیارە پەكەكە ب ئەجیندایێت ژ دەرڤە دڤێت رێگریێ ل هەمبەر ئاڤەدانكرنا قەزایێ بگرت.
تُتاح هذه الصورة أيضا في: کوردی
