Komîsyona Hilbijartinan yekemîn pêngava referandûmê davêje
Rûdaw
Piştî Cejna Remezanê Komîsyona Bilind a Hilbijartin û Rapirsiyan a Herêma Kurdistanê, ji bo di referandûmê de li ser sandûqan kar bikin, dest bi wergirtina 60 hezar karmendan dike.
Serokê Civata Komîsyaran a Komîsyona Bilind a Hilbijartin û Rapirsiyan a Herêma Kurdistanê Hindirîn Mihemed ji Rûdawê re ragihand: “Ev 60 hezar karmend ji bo birêxistina karên ser sandûqan dê werin erkdarkirin. Kar ne hêsan e û wext lazim e. lewma piştî bêhnvedana cejnê em ê dest bi wergirtina van karmanedan bikin.”
Hindirîn Mihemed da zanîn, ku ev karmend dê bi awayeke demkî, bi girêbest werin wergirtin û heqdestê wan jî dê 100 dolar be.
Roja 7ê Hezîrana 2017ê, Serokê Herêma Kurdistanê Mesûd Barzanî li gel piraniya partiyên nav hikûmet û parlamentoyê civiya û roja 25ê Îlona 2017ê jî weke roja referandûma serxwebûnê, diyar kir. Vê biryarê li Iraq û navendên navdewletî deng veda û rastê karvedanên cuda hat.
Piştî vê yekê hikûmeta Herêma Kurdistanê, ji bo xercên referandûmê 6 milyon dolar xiste ser hejmara bankê ya Komîsyona Bilind a Hilbijartin û Rapirsiyan a Herêma Kurdistanê.
Beriya niha Komîsyona Bilind a Hilbijartin û Rapirsiyan, ji bo hilbijartinên Serokatiya Herêma Kurdistanê û parlamentoyê daxwaza 35 milyon dolaran kiribû.
تُتاح هذه الصورة أيضا في: Kurdî
