ئازار 29, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

خالد خدر:ئەڤە داوی خالە بۆ گەهشتنا ئارمانجێن نەتەوەی و راگەهاندنا دەولەتا كوردی

ئەڤە داوی خالە بۆ گەهشتنا ئارمانجێن نەتەوەی و راگەهاندنا دەولەتا كوردی
خالد خدر
ئیرۆ ل جادا كوردستانی بابەتێ‌ هەری بالكێش و گەرم بابەتێ‌ ڕاپرسیێ‌ یە ل هەرێما كوردستانێ‌ ،لسەر وەرگرتنا رایا گەلێ‌ كوردستانێ‌ سەبارەت جودابوونێ‌ ژ عێراقێ‌ ب شێوەكی یاسایی ولدیڤ رێسا و رێككەفتنێن نێڤ دەولەتی ، هەلبەت راپرسی مافەكی سروشتیێ‌ گەلێ‌ كوردستانێ‌ یە ولسەر هەر پرسەكێ‌ نەبەس لسەر جودابوونێ‌ ژ عێراقێ‌ ، هەر نەتەوەكی یان گەلەكی ل جیهانێ‌ مافێ‌ راپرسیێ‌ هەیە و لسەر هەر بابەتەكی بت چ سیاسی بە وئابووری بە یان رەوشەنبیری بە وهتد…، بۆ نموونە گەلێ‌ بریتانی ڕاپرسی كر لسەر مانێ‌ یان جودابوونێ‌ ژئێكەتییا ئەورۆپا و خۆ جوداكر ،ئەڤە نێزیكی چەرخەكی سالایە ئەم گەلێ‌ هەرێما كوردستانێ‌ دگەل وەلاتێ‌ عێراقێ‌ دژین ، ل هیچ جارەكی ژی ئەم نەهژمارتینە وەك هەڤپشكێن خۆ یێن سەرەكی بەلكو بەردەوام ستەم و ستەمكاری ل گەلێ‌ مە كرینە ، و ئەم دهژمارتین هاوەلاتیێن پلە دو وسێ‌ و هندەك جاران هەر ئەم وەك مرۆڤ ژی نە دهژمارتین.
حكومەتێن عێراقێ‌ یێن ئێك لدیڤ ئێك هەموویان باوەری ب مافێ‌ گەلێ‌ كوردستانێ‌ نەبوو ، و هەر چەكەك یان جۆرەكی ستەمكاریێ‌ ئەوان ل دژی مە بكارئینایە ،بگرە ژ سەردەمێ‌ پاشایەتی تا بگەهیتە دەستهەلاتا نوری مالكی یا كو بوویە هاندەر و ریخۆشكەر بۆ هێرشا تیرۆرستێن داعش لسەر هەرێما كوردستانێ‌ ل تەباخا سالا2014ێ‌، ئەوانا ئەنفال ب سەرێ‌ گەلێ‌ مەئینان و چەكێ‌ قەدەغەكری ژلایێ‌ نیڤ دەولەتی ڤە ل دژی مە بكارئینا ل سالا1988ێ‌ ،ب كورتی وكرمانجی عێراقێ‌ چوو باوەری ب مافێ‌ گەلێ‌ مە نینە ،و ل هیچ وەختەكی وان ئەم نە داناینە هەڤپشكێن خۆ و وەلاتێ‌ خۆ و بهیچ رەنگەكی باوەریا وان ب پێكڤەژیانا نەتەوەی و ئایینی و سیاسی و جڤاكی نینە ، مە ژی وەك گەلێ‌ كوردستانێ‌ ب تایبەتی ل هەرێمێ‌ گەلەك ویستگەهێن گرنگ و سەخت و دژوار دەرباس كرینە ، دەربارەیی گەهشتنا مافێن خۆ یێن رەوا و دڤی چارچووڤەی دا مە قووربانیێن مەزن پێشكێش كرینە ،و ب بۆچوونا گەلەك سیاسەتمەدار و نڤیسكار و سرۆڤەكارا، ئەڤە داویی ویستگەهە بۆ گەهشتنا ئارمانجێن نەتەوەی و راگەهاندنا دەولەتا كوردی، یا كو خەونا هەر تاكەكی كوردستانی یێ‌ كو هەست و هشیاریا نەتەوەی ونیشتمانی ل جەم وی هەبت ، مە پێشڤەچوونێن مەزن و گرنگ بخۆڤە دیتینە ژئالیێ‌ هەر بوارەكی ڤە ئانكو هەم مەرج و خالێت دەولەتبوونێ‌ پەیدابووینە و ئێدی لێڤە نابین ژ ڤێ‌ ئاۆمانجا پیرۆز ،تشتێ‌ هەری گرنگ ل ڤێ‌ قۆناغێ‌ دا بۆ مە كوردستانیا ئێكگرتن و چارەكرن یان پاشئێخستنا ناكۆكیێن ناڤخۆیی ،چنكو ریفراندۆم یان دەولەتبوون نە بۆ ئایینەكی بتنێ‌ یە یان نەتەوەكێ‌ یان بۆ حزبەكێ‌ بۆ تەڤایا ئایین ونەتەوە و حزبێن كوردستانی یە ، جیێ‌ مخابنیێ‌ یە كو ناكۆكیێن دناڤبەرا ڤان لایەنێن سیاسیێن كوردستانێ‌ بووینە ئاستەنگ د رێیا راپرسییێ‌ دا ،دیسا ئەڤ بابەتە كرینە كێشەیەكا حزبی و كێشەیا سەرەكی ژبیركرینە ئەوژی كێشەیا یا نەتەوەی یە ب هێجەتا وێ‌ چەندێ‌ كو دەم نەیێ‌ گونجایە و سەقایێ‌ عێراقێ‌ و دەڤەرێ‌ نەیێ‌ لبارە ،جارێ‌ چارەنڤیسێ‌ گەلێ‌ مە گرنگترە یان رەوشا عێراقێ‌.
تشتێ‌ فەر مە دڤێت بێژین كو هەر كەسەك یان ئالییەك ببتە ئاستەنگ یان رێگر ژبۆگەهشتنا ئارمانجێن گەلێ‌ مە یێن نەتەوەی،دیرۆك دێ‌ نەفرەتا ل وان بارینت و هیچ دلۆڤانیێ‌ ب وان نابەت،یادی پێتڤییە لسەر هەرتاكەكی ڤی وەلاتی بێژت بەلێ‌ بۆ راپرسییێ‌.

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi